AKTM 41 buba Saisapongmung tembangogo

AKTM saisapong sentong nung match patron DDMO, Temsüwangshi Jamiri volleyball final asayatsüpur den salem yonga aoba mapang tangokba noksa nung angur. Süngratsü, January 12, 2017.

Süngratsü, January 12 (TYO): Asetkong Kaketshir Telungjem Mungdang (AKTM) 41 buba lokti senden den külemi saisapong sentong ka Brishostibarnü yangi Govt. High School Alongchen play ground nung takok ngua ayongzüka asayaogo.
Iba saisapongmung shibangba sentong nung Chief Patron, District Disaster Management Officer (D.C Office Mokokchung), Sp. Temsüwangshi Jamiri mapang tatsüka agia jembidang, Dr. T.Ao-i India tenüng nung football captain sür Olympic nung shilem agiba sülen tanü joko küm 60 dak tali arur, ajisüaka, pa menepa asaya kecha nunga asen Aotsür/Aor kata madokteter, ta sasaba olen ka metetdaktsü.
Tanü asen Aor Jonathan-i cricket nung aser Linen Jamir-i lawn tennis nung tangar menepa asayaba ngua kanga pela bilemer. Aji oda, saisapong luyimba nung ya ngujem (scope) tulu lir asünung, mapang intokba dang masü saka sempet aketertemibo iba tsütsü temulung agüja asayatsüla, ta paisa kaketshirtem ajungshia liasü.
Paisa nüngtugu basketball asayar Michael Jordan taküm otsü atishia ashidang, pa ya ayongayonga nüngtugu akümba asayar ka masü saka pa taküm nung timtem jenti ajangshiba ajanga pa alimai metetba asayar ka akümba amaji asayartemi khenkhen tamakok angudang tezü metangi maneni asayatsü asoshi tayongzükba ka agütsü.
Taküm iba mungdang nung shimtetba asayaji; Volleyball aser Basketball na liasü. Volleyball tetsür asayaba nung Longpa kaketshir mezüngbuba aser Süngratsü kaketshirtem tanabuba jenjang nung liasü.
Basketball tebur asayaba nung Süngratsü kaketshir mezüngbuba aser Longpa kaketshirtem tanabuba jenjang liasü. Volleyball tebur asayaba nunga Süngratsü kaketshir mezüngbuba aser Longjang kaketshirtem tanabuba jenjang nung liasü.