AKTM-i education department dang akhanger

Dimapur, April 18 (TYO) : Asetkong Kaketshir Telongjem Mungdang (AKTM) ketdangpurtemi April 13 nungi 18, 2016 tashi Asetkong nung aliba school balala semdanga senzüdang metokmeperi aika ajitetogo.

Kaketshirtem atema first quarterly assessment agitsü mapang tonga aruaka tang tashi Government Primary School kaketshir nem textbook magütsüba atema mepelar ta AKTM sangdong ka nung metetdaktsü.

Kaketshirtem jenjang meraksadaktsütsü atema Department-i tekaratiba nung textbook agütsütsü ta AKTM-isa metetdaktsü.

AKTM-isa School kar nung tesayur peria maliba ajitet aser GPS Longjang Compound o GMS Sungratsu nung Hindi tesayur den Ao & Mathematics subject tesayur maliba aser GPS Yimchalu nung tesayur ana dang lir. Iba dak sendakba nung bangdak ketdangsertemi tekaratiba nung tesayurtem yoktsü akhanger, ta AKTM-isa metetdaktsü.

GHS Kobulong sangküm hon jubilee amungtsüba lir anungji ibaji matongdang school ki yanglutsüla, kechiyong class room teimbaka tamentsü mejungi kümogo aser metsümeshidak tesempatsüka lir, ta AKTM-isa ashi.

Parnokisa Mid Day Meal scheme kübok Cook honorarium aser school maintenance atema Grant-in aids agütsütsüla ta takhangba agütsü.

School kar nung mapang shitak mamshiba aser kar nung non-teaching staff mapai maruba amala ajitetogo. Ibala inyakyim magizüktsü aser tim teinyaktsü lenmang ajanga aibelenertem merenshitsü, ta AKTM-isa metetdaktsü.