AKTM-i ‘Greening Asetkong’ project inyak

Mokokchung, October 13 (TYO): October 10, 2016 nü Asetkong Students’ Conference (AKTM) Tir leniba nung külem tenzükertem aser executive züngsemtemi Asetkong-Tzüsangra Road (AT road) nung ‘Greening Asetkong Project’ mapatong maneni inyaka liasü; iba project ya tamalen Geology & Mining Parliamentary Secretary, Dr. Imtiwapang Aier-i tenzükja liasü.
Iba project mezüngbuba shilem nung parnoki AT-Road kilometer 30 nung süngdong meyirijang ka dak tema tema liasü. Taruba küm pongu tsüngda gari lenmang tip anatsülen tajangzük agütsüba süngdonglidongtem tanaben asentenshitsü aser süngjanglijang tangtsütsü nükjidong yur iba project tenzüka liasü.
Tanü iba project follow up nung AKTM ketdangsertemi kilometer 30 lenmang nung süngdong 50 dak tema tema yutsüogo. Süngdong ainba reprangshiba den külemi süngdong tasü melena tasen atemtsü asoshi AKTM-i follow up mapatong ya ita ana-asemshia inyaker.
‘Greening Asetkong Project’ ya taküm World Environment Day, July 26 nü 23 Impur A/C MLA, Dr. Imtiwapang Aier-i tenzüktsü. Iba den külemi küm shia July 26 nü Asetkong nung ‘Greening Asetkong Day’ amongtsü lemteta lir.
Iba project ya Dr. Imtiwapang Aier-i apiteta liasü aser paisa iba project tajungtiba inyakba AKTM telen nem ‘Green Asetkong Day’ anogomung nung sempet agütsütsü ta sangdongogo.
AKTM-isa, süngdonglidong atsüteta indoktsür mesüra raksatsür nem temerenshi tulu agütsütsü ta metetdaktsüogo.