AKTM lokti senden meraketa tenzükogo

Süngratsü, Jan 10 (TYO): Asetkong Kaketshir Telungjem Mungdang (AKTM) 41 buba lokti senden “tanü tensa nung yashi indang” omen nung ajemdaker yangi Süngratsü yimdak meraketa tenzükogo. Iba sentong nung AKTM kübok unit balala nungi tejaoker noklang aika adenshia longsotepa mungdagi.
Taonung mungdang lapoktsür Nagaland PHED Secretary Dr. Maongwati Aier IAS-i jembidang, Yirusalem jara aser süngküm laor alidang Nehimiai anir mesoba amaji tanü Naga lima laor aliba ya mesotsü asoshi bendanga agütsüba lenir nüngdaker, ta tayongzükba ka agütsü.
Alimaji nisung ka kisüngi meyanglutet, anungji, ajak ka küma lungjemer asen lima laoa alibaji mesotsü asoshi, paisa kaketshirtem ayongzüka liasü.
Lanurtem dak tashi tulu lir, anungji, tanü lanurtemi junga inyakra asüng mangdang tajung kar, saka azümesena lira tarutsü nüklaji sadema mangur, ta paisa ashi.
Paisa lanurtem dang inyakdaktsünüba olen ka ashidang, ochi aser tazüokba nung shisatsü bushitsüla. Talangka züngaka nisung ka dak tazüokba melira lokti nung tagidak makatsü, ta paisa ayongzük.
Sentong nung tongti o jembir City Law College Dimapur Principal, Leonard Aieri “tanü tensa nung yashi indang” onük nung ajemdaker tagitsü o aika shia mungdangsanger ayongzüka liasü.
Shisaluyim balala nung tangar dang alakteta takok angur Asetkong kaketshir kar nem konang tetushi agüja liasü. Sentong nung Süngratsü Village Council Chairman, M.Teka Longchari tarurtem ajak pela agizük. Ongpangkong Kaketshir Mungdang tir R.Sunep Pongen, Jangpetkong Kaketshir Mungdang tir Merang Ozüküm aser Tzürangkong Kaketshir Mungdang tir L Alem Jamir parnoki olendang balala bener arua tesentepertem ayongzük.