Akümketa alitsüla

Nisung taküm ka atema nüngdak tulutibaji akümketa alitsüba taküm asütsü. Ibayongji, ajaki akümketa linür aser ajaki ajak nem akümtsübudaktsüner. Iba shisatsüji tulur tilar, takar makar aser tanur tain ajak dak keta lir. Iba jagi loktiliba nung aser asen kibong nung dena kati ka akümtsübutepa alitsübaji kanga nüngdak adoker. Atangji, tangari akümtsübutsüsa alitsübaji pei dak aket saka ano asenoki tangar akümtsübua amshitsüba purtem kar lir. Itemji tila tanur aser tantsür tamburtem. Tila tanurtem danga parnok tanur dangji ta bilema parnok mezüngmeshia jembira, parnoki asenok aküm metsübutsü, anungji tashi mangatsü. Iba amaji tantsür tamburtem danga asenoki parnok akümtsübu sayua meima inyaktsübaji kanga tongtibang lir. Tila tanurtemji ken toktsür, asen alidak tantsür tamburtem meshimetsüa senzüdaktsüra mesüra parnok nümamedangtsüsa asenoki parnok dang inyakra, iba jagi parnok aküm dang masü saka asen lima aser lokti aküm samar. Aji oda, tantsür tamburtem akümtsübua amshitsü indang bilemdang, parnok ita tetenzüklen bank nung pension kaket tilala kaka amer anogo piyong amendaka maka nokdaker nungtepa angudang kanga akseta bilemer. Tantsür tamburtemji yamaji kima yimdong nung mesüra bank nung aniseta nokdakdaktsüba jagi parnok akümmaket kümdaktsür aser parnok aküm maket akümba jagi asenok aküm maketer. Shitakba agi, parnokji bank-i pei sen agizüki arudanga parnok nem tama agütsütsü aser atatsüsa kümra metsümeshidak tesem paria alidak menden tajung nung mener atatsüsa renemtsütsüla. Ajisüaka, tanü state bank nung tantsür tambur pension sen agizüki arurtemji pei sen agizüki arur masü saka takar kima meshimetsütsü aruba ama teküpbok jenjang nung yutsür. Iba ama pei sen agizüktsü ataba mapang tesem kar nungbo mangmanga laoba aser asüba otsü ataloka lir. Iba timtemji reprangteta anepalutsü nüngdak anguba agi taoba hopta nung ” Nagaland kübok district shia nung pensioner-tem atema bank balaka lapok nunga koma süla ?” ta asüba tasüngdangba ka nung asenoki bilemdangogo. Atangji, telangzür tajung kati ashi ama, pensioner-tem atema bank balaka melapokyonga bank ajak nung parnok asoshi counter balaka lapoktsüra, iba jagi anisüngzük tuluka angutsü. Hau, tanga bank ajak nung ‘Senior citizens’ atemabo counter balaka lapokja lir, anungji pensioner-tema iba counter-ji amshitettsü. Ajisüaka, tang timtem kaji SBI dak alaka tanga bank nung pension magizüktetter, iba jagi ita tatem nung nungteper. Anungji, ano telangzür kati ashi ama, bank ajak nung pension angutsüsa yaktasa mapa tenzüktsüla. Iba jagi nungtepba timtem tebilemtsü ya anentsü. Atangji, tanga pensioner shiai bank nung bank account lapoka ayu nungbo pension sen agizüktsü asoshi mongdanger amai adenshia nungteptsü nüngdak madoktsü. Kodang, bank nung pei account lapoka yudir, yangji dang sorkar nungi yokba senji indangindanga ita tatem den külemi pei account jagi aitsü aser ajibo pei agizüknü dang agizüktsü. Ibaji memetetba agi mesüra meteter meinyakba agi balaka tantsür tamburtem pension sen agizükdang timatemer. Item lenmangtemji lanurtemi tantsür tamburtem den lemsatepa yariteptsüla. Tantsür tambur ka asenok jakdang anogo piyong pension sen agizüktsü nokdaka angubaji asenok asoshi meraket masü. Iba kasaji tantsür tambur ka asenok jakdang khu tuluka bener aoba jagi asenok ajak aküm meketdaktsür. Ibaji dang masü saka tantsür tambur kümer achiajemtsü mali meshimetsüa senzüdaktsübaji pa aser la atema dang masü saka chirnur aser lanurtem atema maksü tulu lir. Akok tashi, sorkar aser bank inyakyim nung dang masü saka lokti aser arogo nunga asenoki tantsür tamburtem ya kanga akümketdakja amshitsüla. Iba tangatetba nung alima ajunga nung küm shia teintet aser tantsür tamburtem anogo amonger. Atangji, lanur tajung aliba agi tarutsü teimla tajung sayur saka tanübo tantsür tamburtem akümketdakja aliba agidang alima aser loktiliba topur jungdaktsür.