Al-Qaeda Commander tongti ka tepsetogo

Bamako, Tsüklai/February 23 (Agencies): France nunger sepaitemi Mali nung jihadist lenir tongti ka tepsetogo, ta sorkari Hokolbarnü metetdaktsü. Iba ajanga Sahel tesem nung westener tem pua ayuba ken o nung aija alir tongtiba küm ka shi arishiba tembangdaktsüogo.
Al-Qaeda in the Islamic Maghreb (AQIM) nung Algeria nunger commander Djamel Okacha, French commando temi Brehostibarnü tepsetogo. Sepaitemi helicopters aser drone amshia Timbuktu north len pa mena aliba gari densema gari ishika amakba mapang nung pa tepset, ta France nunger ketdangsertemi ashi.
Okacha shiba dang Yahya Abou El Hamame taa ajar, pa ya senotsü teyari agütsür aser tasa asar tongti ka liasü, ta defence ministry-i ashi.
North aser West Africa nung Westerner tem aika pua ayuba dak sendakba nung US ketdangsertemi pa aija liasü.
France Ato Kilonser Edouard Philippe, Hokolbarnü Defence Minister Florence Parly den Bamako tongogo. Parnoki mali pusemba sayutsü asoshi tang pai linük yimtiba semdangogo, kong 2014 küm nungi France nunger sepai 4,500 shi linük north len jihadist tem den raradar.
Parly-i ashiba agi, jihadist commander tepsetba ya jenjang tajung ka lir shiba küm ishika arishia aruogo.
Pa asüba ajanga Sahel nung kiralongrar tem tashi tajemba kümdaktsütsü,” ta lai ashi.
“Commando tem parnok anasa aoba mapang nung jihadist temi parnok dak akha tenzük aser iba ajanga helicopter tem amshia parnok dak meyiper akhatsüsa aküm,” ta French military command otongdari ashi.
El Hamame densema kiralongrar parnok 11 tepset, ta paisa ashi.
2009 küm US nunger Christopher Leggett, Mauritania nung tepesetba ken o nung El Hamame densema alitsü ta temulung melemi bilemer aser kasa küm Nouakchott nung French embassy amakba nunga densema alitsü ta temulung melemi bielmer.
Kasa mapang nung France teyari nung Burkina Faso, Chad, Mali, Mauritania aser Niger-i jihadists tem den raratsü atema G5 Sahel group ka tenteta lir.