Al Qaeda lenir tepsetogo: Pentagon

Washington, October 19 (Agencies): Al Qaeda network, Khorasan Group ta ajaba nung tongti lenir ka tawa anünglen nungi amakba mapang tepsetogo, ta Deobar aonung United States Department of Defense headquarters, Pentagon sangdong ajanga metetdaktsü.
Khorasan Group tongti lenir, Mohsen Adballah Ibrahim al Charekh, shiba dang Sanafi Al Nasr ta-a ajar, pa October 15, 2015 nü anünglen nungi amakba mapang northwest Syria nung tepsetogo, ta Pentagon-i ashiba osang Xinhua news agency ajanga metetdaktsü.
“Khorasan Group-i US aser ozü den teloktep linüktem amaktsü aliba sentong raksatsütsü nükjidong nung iba operation tenzük, aser iba ya ajanga onok anema apusortemji onoki memaktettsü masü, ta maneni kuli sayuogo,” ta Pentagon-i ashi.
Khorasan Group tongti Sanafi Al Nasr-i Gulf tesem nung sen tenlartem nungi anguba senji Iraq-i yoker, iba sülen Pakistan nung Al Qaeda lenirtem ket nungi Syria linüki yoker.
Sangdong ajangasa, Al Nasr ya mapang talangka nungi Al Qaeda atema sen lenmang bushiba aser rarartem bushiba maparen nung aika ajangshia alir Jihadi ka lir, ta ashi.
Al Qaeda nung züngsem tasen akümertem Pakistan nungi Turkey linük adena Syria-i aotsü asoshi pai acha-ayangba den külemi lenmang tuyua liasü. Pai anüdoklen Al Qaeda indang external operation nunga yaria liasü, ta Pentagon sangdong ajangasa ashi.
Sanafi Al Nasr ya Iran nung amenoka aliba Al Qaeda indang network atema inyaka liasü aser 2012 küm pai Al Qaeda indang senotsü ketdangsüba tongti mapa agizüka liasü aser 2013 küm Syria-i ao, ta kasa sangdong ajanga ashi.