Al-Qaida-i India nung Yihuda nunger amaktsüa akok

New Delhi, September 26 (Agencies): Intelligence agencies ajanga kiralongrar telok al-Qaida aser Islamic States (IS) nung dena aliba kiralongrar cells-i September aser October ita India nung aliba Yihuda nunger aser Israel nunger amaktsü sentong yangludar, ta metetdaktsü.
September aser October ita nung Yihuda nunger sodi asemben tenjir, mezüngbubaji September 29 aser October 1 nung Rosh HaShanah (Jewish New Year) sodi lir, October 8-9 nung Yom Kippur (Judaism nung temeshitiba anogo) aser October 13 nungi October 22 tashiji Sukkot benjung lir.
Tanga linüktem nungi agency temi Intelligence agency dang, kiralongrar teloktemi New Delhi nung aliba Israeli embassy amaktsü sentong yangludar, ta metetdaktsü.
Kiralongrartemisa school aser hotels densema Israel nungeri kanga bulua semdangba tesemtem amaktsü.
Jammu & Kashmir nung Arrla 370 agienba onük nung Israel-i India pusemba nung ajemdaker kiralongrartemi India nung Israel nunger amaktsü sentong yanglur.
September aser October ita nung Israel nunger benjung mapang Israel nunger raliwalirtem aikati India semdanger aser item benjung mapang nung Israel nunger tesem kar nung kanga bulua senteper.
“Al-Qaida aser IS den densema aliba kiralongrar cells-i alima tesem ajungalen Israel nunger amaktsü sentong yanglur. Iba denji kasa India nunga kiralongrartemi New Delhi nung Israeli Embassy den New Delhi aser tanga yimtitem nung aliba synagogues, Jewish schools, restaurants aser hotels amaktsüa akok,” ta kasa osang ajanga metetdaktsü.
Iba dak sendakba nung Intelligence agencies-i police aser local intelligence unit dang kanga kümküma alitsü metetdaktsü. Iba denji külemi Israel aser Yihuda nunger ki aser rejutem nunga security akangshiogo.