Al-Qaida-i video kar ajanga züngsem shimtsü meranger

January 03 (Agencies): Somalia nung aliba Al-Qaida kongsang ajanga parnok telok nung züngsem tasen shimtsü asoshi kin o kin anemtepba anema aser Muslim tamangba yimsü wazüka ayuba video ka nung US nung Republican telok nungi Tir atema tokteptsü alisang, Donald Trump-i linüki Muslim nunger maidaktsütsü ta ashiba dena Hokolbarnü saya liasü.
Iba video ya al-Shabab teloki sayaba lir aser jihad atema rarartemi Trump noksa amshibaji tan ya mezüng lir. Taoba ita Democratic party nung Tir atema olemtep ka akaba mapang, Hillary Clinton-i, Islamic State teloki parnok züngsem tasen shimtsü asoshi Trump indang video ka amshidar, ta shia liasü, ajisüaka iba video ji teyangluba ka lir ta tesülen meteta aru.
Al-Qaida aser Islamic State na ya jihad atema rarar tsükchir telok ana lir aser parnok tsüngda nütsüng yongsük aser rongsen tsütsü kanga tokteper.
Parnoki tan sayaba video ya Minnesota nungi ‘Somali-American jihadis’ aser Canada nungia ka ta Somalia rara tongpang nung asüba dak ajemdaker yangluba lir. Iba video ya jihad olulu asadanger telok, SITE Intelligence Group-i kanga junga asadangogo aser parnoki ashiba agi, iba video ya ‘African-American’ telok dak rangloker yangluba lir.
America nung alir Africa nunger dak America nungeri tim masü benshiba aser par kin anema inyakba dak ajemdaker, Islam tamangba agizüker jihad asoshi raratsü iba video ajanga tanak nisung ajungshir.
Iba minute 51 talang video nung Malcolm X aser US nunger police temi jembiba o kar den America nunger police temi America nung alir Africa nunger rishikangshiba aser tepuokdak yua alirtem densema lir.
2011 küm U.S. drone-i amakba mapang America nunger Qaida kübok aliba telok ka nung züngsem, Anwar al-Awlaki tepsetba dena iba video nung lir aser parnoki video nung ashiba agi, US nungeri Islam tamangbaji tashidaka atutsüsa sembar.
“Muslim nungerji ka danga United States telungi maidaktsütsü,” ta Trump-i ashiba iba video nung lir.
Al-Qaida ya Islamic State tebu lir ajisüaka Syria rara mapang shisatsü aser asalendong meputepba ajanga telok balala küma pilaba lir.