Al-Shabab teloki lendong atalokdaktsübaren anentsü ajungshir: Hassan Mohamud

Mogadishu, July 02 (Agencies): Al-Shabab telungpurtemi peisasa pei tepsettsü meranga Somalia ajunga nung lendong atalokdaktsüba maparen anentsü tajungshiba olen ka Somalia Tir, Hassan Sheikh Mohamud-i yashi, Hokolbar nü metetdaktsüogo.
Somalia linüki nüchiso ngur küm 56 abensaba bilemtetba sentong nung onük jembidang Islamist telungpur, al-Shabad teloki par amakba maparen anentsü tajungshiba olenji Mohamud-i metetdakja liasü.
“Al-Shabab teloki peisasa pei tepsettsü aser tai maketba nisungtem amakba maparen anentsü aser pei tsürabur aser adinutem amokmerenba maparen anentsü tajungshiba olen ka al-Shabab lenirtem den tan Ramadan lumiba mapang sangoktsür. Parnoki sorkar anemba maparen toktsür sorkar den amalitepa alitsü ayongzüker,” ta pai sangoktsü.
Paisa ashiba agi, African Union (AU) mitkartem, AMISOM nungi teyari agia Somalia mitkartemi al-Shabab telok madak takok ngua raratsü tenzükogo saka par teloki Somalia nung mapang shia lendong atalokdaktsür.
Al-Shabab teloki taoba Honibar nüa Mogadishu yimti nung tentetba hotel ka nung bomb lendong atalokdakja ishiba agi nisung 15 shi poksetdaktsüba osang bushitetogo.
Somalia sorkari par mitkar junga metentettetba yong AMISOM-i joko küm 10 shi Somalia sorkar kümzüka aruba osang bushiteta lir.
Ano külen, Somalia-i taküm 2016 küm election agia parliament upper house tasenba tentettsü renemba osang ka Mohamud-isa metetdaktsüogo.
Italy kübok densemba Somalia nüburtemi nüchiso ngua, parnok den anogo 5 jakdang Britain nungi nüchiso angur  Somalia nüburtem den ka küma lungjemba sülen Somalia ajungai nüchiso ngua, 1960 küm July ita 1 nü linük tasen tenteta liasü.