Alaba, Vidal na Sevilla den masayatsü

Berlin, Rongchii 10 (Agencies): Bayern Munich nungi asayar David Alaba aser Arturo Vidal na Champions League quarter-final second leg Sevilla den Rasemnü asayatsü aliba nung shilem magitsü. Parnoki mezüngbuba leg nung 2-1 agi koka lir.
Fullback Alaba teberem nung timtem aliba ajanga taoba asaya ana tashi masayateti liasü aser midfielder Vidal mezüngbuba leg nung temoko yiruba tang tashi mejungi lir.
“David team den külemi training agidar saka pa taoba anogo ishika shilem magi aruogo aser ano temang kanga tajungbabo masü, anungji pa sessions talila kar nung shilem agiba sülenang Küptok nü nungi asaya tajungba asütsü,” ta Bayern coach Jupp Heynckes-i ashi.
“Yangtep nungibo Arturo Vidal training-i arutsü imlar,” ta paisa ashi.
Bayern pur taküm agi tenetben buba atonga Champions League quarter-final nung shilem agidar aser parnoki asaya pongu anunga lia Bundesliga title dena koktetogo. Parnok tang iba asayamung akoktsü asoshi rangloker inyakdar.
“Onok atema tang kecha tebilemtsü mali saka kanga kümdanga asayatsü nüngdaker,” ta winger Arjen Robben-i ashi.
“Semi-final nung asayatsüba atema o adoka jembidar, saka mezüngbuba asüng junga asayar tejakleni atutsü merangdi. Sevilla puri away nung kanga junga asayatetba sayuogo.
“Onoki Champions League koknera asaya renlokshitsü nüngdaker,” ta paisa ashi.
Bayern puri tatembangsa 2013 küm Champions League kokteta lir. Sevilla-i puri taoba round nung Manchester United pur Old Trafford nung 2-1 agi koka quarter-final tongtetogo.