Alar mulungsentsü melenshir lendeni apusodi- ocet lepla (Rejoinder)

~ T. Meren Paul, Kohima.

Asen Lenir aser Tesayur Wati Longchar, (Tesayur ta amshidi) Serampore nungi asenok Naga nunger aser talisa Aor ajungmesoa aser temelenshitsü shisa lemsa tajung aika osang kaket ajanga kanga junga rateta agütsüba tawa tanü ka nungi maneni sentisa züngdagi. Talisa June 27 aser 28 nung züluba nung tansütsü aser tenyaktsü mapa tajung aika shisema angur. Aji oda süaka June 27 anogo nung züluba nung o tajung aika rongnung odong mezüng nung (first para) ocetra nungji terajem peria magi o tesepra, tejemja aser tai tulu nunglokja zülua aliba angur anungji ni ajakprongla yamaji masüako ta lepla agütsünür. Mezüng puba nung Tesayuri asüngdangbaji “Mokokchung Town nung asen Aori Naga nunger kin palala nem dokan amentsü para ki kowi agüja lir? ” Iba tasüngdangba melangzüdang tamasa Mokokchung Town nung Tesayur-i ashiba kintem- Sema, Lotha, Konyak, Sangtam, Chang, Yimchunger (Yimchungro), Phom, khiamnungan nunger kowi arua lidar aser parnok kowikati Mokokchung Towni shishilembatsü aru? Junga asüngdangya süa züngdang oko ma, aser parnok kowi kati Mokokchung Town nung ki kibur shir dangsa dokan amentsü para ki asüngdanger magütsü ibaji tama jangjatsüla saka tabiji agi bo mashitsüla. Ajidang masü para ki tazüng mali nung tangar dokan mena aliba nung ni pa amenba nungto dokan shishinür kua ta asüngdang nung mezüng alisangji aridoker nisung tasen anir arunung nisungi ang masü Tsüngremia pelatsü na. Tesayur-i tuteta ashiba kin rongnung Sema nunger ken mapang ka nung Mokokchung nung dokan aika mena liasü saka kodang Dimapur renloka akum parnok ajak pei ki tajung süa aliba dena yokdoker Dimapur shishilembatsü aser talitsü tesademba alidagi lua adok. Hau 1983 Ao-Sema tsüngda Mokokchung Town nung mepetmesü adokba sülen ishika anunga aliba temjia Mokokchung doktsür oadokogo.
Tanungba kin rong nung Lotha dak alaka tanga kin temji pei Yimti nung shishilemba mesütet nung asen Mokokchungi arua asen Aor den aser Tzümar den raktepa tokteptettsü no? Parnok kecha maka Mokokchungi aruer talitsü asoshi para ki aser Dokan amentsü ki ta ki anaprongla para agüja mejimena shishia takum letettsü no? Asenoki jembitsü temela saka mapa kuma inyaktettsü asü masü ta (practicable) junga asahdangtsüla.
Dokan amentsü/shishilembatsü asoshi para ki ka angutsübaji dang masü, tenzüktsü sen telong junga (Seed Money/Capital investment) nüngdaker. Asen nübor ano shishilembatsü tera mayang (business acumen), arena sendem agir shishilembatsü tenzüknung anogodong yokzükbaji chia anidaker aser kum eshika nung sendong (capital/principle) chimar dokan shibangtsüsa akumer. Tzümartem ya aso aika shishilembaa aruba, bannia ta ajar aser parnoki sendong nungi techanu mepudaktsür saka asenokbo sendong chimar. Mapa keji südir süaka ajak nung tetoktepba ka lira aser Charles Darwin-i ashiba ama tashi taiba takum alir (survival of the fittest) tashi maiter samaa aoer.
Tanapuba nung, “saka tzümari sahib ta ajatsü aser mapang mashika nung parnokbo meindoktsü akok, mesüra merenshitsü akoktsü ta asüba agi parnok nem agütsü”. Ibai Tesayuri pa mulung nung bilemba saka Mokokchung Town nung Aor ki kibur shinga mulung nung iba shisatsü dena malitsü ta nibo amanger. Saka Tesayur-i yamaji bushiteta lirabang ki kibur paika yagi yamaji inyaker ta züngdangba tejangja ashitsüla. Mokokchung nung dokan shishir Aso (generation) asem puba tashi ketsa ki memelenshi aliba ni metetbaa karbo lir, tat agi Lt. Imonungba (Longjang) er kidang Samson Dress ta sür dokan tejen ka lir, Lt. Arishinganger (Chuchuyimlang) kidanga Hills Hardware dokan lir. Ki kibur aser dokan kibur (Land lord & Tenant) tsüngda tangatettep tajung nung alir aser dokan ken amenokkaji par dokan meloksep tashi ketsa kidang kum masü putu renteta alir. Ni tanur asüdang kübo den Mokokchungi atudang item dokan nung shishi aser talisa ni bilemtetbaji Samson Dress dokan nung tola aser half pant alia asemba, Hills Harware nung kojal aliba nüklai arur aser ni tang kum 72 tain saka tanü tashi item dokantemji angur. Tzümaer ar ta sür aseni meindoknüdang kodasür meindoktsüaka, saka item tzümar dokan dangji ki kiburi mahajan ta ajar aser mahajanba jagi ki kibur dangji sahib ta masü Baba ta ajar aser akum tsüpur. Tesayuri Mokokchung kodang tesüsa semdang ar kum eshika jakdang Mian (Bangladeshi) nunger Mokokchung nungi odaktsüba sülenbo asen Ao tsür Aori amenba dokan aika kümogo. Takokeribo Mokokchung nung business tulu inyak dagini. Ungma nunger M. Bendangnükshi Longkumer, shiba Longkumer Gas Agency kibur lir pai Whole Sale eshika ama lir. Mokokchung nung Printing Press Tzümar indang kata mali ama bilemer. Mezüng Jamir Art Press liasü, iba sülen ACYE Press, Shoppe Press aser tang Ungma nunger Tsükti Longkumer indang Longpok Offset Printing Press lir aser paisa Mokokchung nung Hotel tajungtiba Whispering Wind lapoka lir. Ano tanapuba Hotel tajungtiba Hotel Metsüben, Chuchuyimpang nunger Moasangbai shishidaki. Mopongchuket nunger Watitemjen, pai Travel Agency Mokokchung-Guwahati Service ayimpanga inyakdaki aser Aliba nunger Bendangtoshi Lim Travel Mokokchung -Kohima kum aika senzüdaki. Yamaji senkar temibo pei akok tashi pei sasep nung amokpanga inyakdaki. Mokokchung nung Tea Stall dak alaka Hotel aser Restaurant ajak asen nisungi inyakba angur.
Lenir Tesayuri ashiba ama meinyakba shilem aika lir aser asenoki service sector aser hospitality sector nung meinyaktetbaji asenok tepok tulu aser nüpoaah (hajar) tulu meshir anungji asenoki mesapoba dang masü asen nüpu aaher mali kechiba süra tzümari jenjang talangba aser sen eshiba agi inyaktsü mulunga lir. Jembishiyonga ajak pronglai sen dhalangba aser tajemba agi mapa renemtsu bilemer.
Mokokchung nung ozü ki maka saka Changtongya Town nung küboi asüba ki dokan takdang pezü aketba para ki ka lir. Takdang ka asen nisungi dokan shishir aser kum 45 tashi arur saka asen nisung dokan kibur 5 ben tashi melentepa amener. Tzümar dokan asem lir saka parnokji kum 30 tema maitsüi kipong kuma chirnur schooli oa lidagi. Ni Kohima nung alir aser ozü ki kiya nung süaka main road nung asüba agi First Floor nung dokan para takdang karh lir. Kum 8 tsüngda nung parnok local nisung palala 5 puba dokan mendanger tangbo shibangogo. Mapa tanga meinyakba asoshibo asenoki kechiba meinyaknür ta aramesodaktsüdi saka dokan meshishitetba atemabo ajungshitsü tasak. Asenok local nisung aika Bank Loan agir dokan lapokba sentsü maoteti Court ajanga certificate issue asüba paper nung angur. Business inyaktsü loan agiba ya asen ket nung akaba sen agi metongjemba peritsü asoshi agir saka business inyaktsu asoshi sen ajak loan agirbo takok ngua kodanga meinyaktettsü.
Tejakleni aoba lima Taiwan agi atishia tenemtsüng nung lua alitsü aser alu ayimtsü ajungshibaji kanga shidak aser yimchiyimjung nükla. Saka Taiwan lima tenemtsüng nung Govt-i ali lemzüktsür alu yimdaktsüba maparenji asen den mapetba mapa kechiyong asenokbo ali lushi ajak yimtsüng ka kübok kibur aliba lima dang aser Govt li maka. Asen Aortem Tzürangkong aser Tuli lenden jagi aluyimtsü senzüka alu nung shir li nung na alu ayimtsü. Anungji tenemtsüng ali kibur yim eshika asoshi mejetmejeta jembitsüren saka Aor ajak ayongzüktsüla masüa ta angajemdi.
Yimsoshiba indang (civilization) ojang ka, tejen civilization pungu rongnung Andean civilization Peru aser Mexico ya tenem nung atalokba, Inca capital 3000 meter above Sea level liasü. Asen Aor Jungleyimti nung yimsoshir apusoa arua Aonglenten/Soyim, Koridang nung lir milungi Ao lima ajak ayimsunga amokbanga lia ao. Tang Tenemtsüng bushia lua alitsüba dangji yimsoshiba ta masü yimkumshiba ta ajatsü (migration) Tsüklu dak alaka tenem lima tsünütettsü süngjang/lashi aser aonsutsü aika lir aser itumji Organic farming inyaktettsü. Ali nungi madoktsü kejah mali. Hon taribi, totsü, alimijang (coal), chiyungtsü ajak ali nungi adoker. Asen temang dena Tsüngremi ali aki yanglu. süngjang/lashi aser aonsutsü yimtsüngshia nungi adokdaktsütsü merangteptsü ashi kin ka rangben yim doktsür alima tasen bushia oa yim tasen akumba putu to süiogo ta nibo bilemer.
Taiwan Lima tejakleni aoba indang zülua angudang nia 1987 kum 79th Lions Club International Conference Taipei nung amongdang Taiwna-i aoba menungraa bilemteter. Conference center ji World Trade Center nung liasü aser anogo 5 nü Taipei nung among. Taiwan ya mezüng tenüngji Dutch Formosa Island ta jaa liasü aser asen Naga nunger ya Formosa Island nungjagi aru südi ta Anthropologist temi ashir. Chang Kai Shek-i (China nunger olasü Shek ta masü Sü ta adoker) aniba KMT party yimsüsüba Mao Tse Tung-i aniba Cultural Revolution agi atsüngdok anungji Chang Kai Shek Taiwan province nung jenok aser Republic of China ta sür UNO nung membership ngur liasü saka 1970 kum Dr. Henry Kissenger, US Secretary of State mapang US aser China table Tennis asaya ka ayongzük , koba dang Ping Pong Politics ta ajar, aser mainland China koba People Republic of China ta tenüng jateter liasü parnokjiang UN nung züngsem asütsü America-i yaritsü nangzük. Aji oda Taiwan ROC UN nungi aridok aser China PRC UN nung aniok. Chang Kai Shek Taiwan nung jenokdang Hon taribi aser sen rongsen ajak aser Chinese monument aika Taiwan-i bener ao aser iba senji amshia Taiwan amentet aser takar lima kuma yanglutet. Beijing Museum dang nungibo Taipei Museum nung Chinese nüngo oset teimba angur.
Taiwan lima ya 35,808 sq Km (13,826 sq Mile) tasazük lir anungji Nagaland 16, 579 sq km (6401 sq Mile) dang nungi anasü agi tuluba lir aser tenem lima süaka tenemtsüng lenden shilem 34% lir anungji aluyimtsü tesem peria aliba lima. Taiwan ya asetkong lima anungji tzüyim agi meketbanga aliba lima asünung Industry aika amenoka lir. Parnok aluyimba shilem pezü lemsa-a lir, yamai- Tsünüsenpongtsü (plant crops) 47.88 %, Shiruru metsüba (Live stock) 31.16%, Ango metsüba (Fishery) 20.87 %, Forest 0.09 %. Parnok yonksük nungi 5% (population) dang aluyimba nung shilem agia lir saka yongsük teimba Industry worker. Taiwan yongsük 23.7 million nung mapa mangur (unemployment) 3.8 % (2019 census) Asenok Naga nunger yonsük million 2 shi dang aser mapa mangurji 23.75%. Parnokbo ajak pronglai langkabosa inyaktsü merangba agi employment rate kanga sashia tua lir. Taiwan koba akidang Formosa ta aja yang nungjagi asenok tsürapur tem aru süra temesüktep mapa aser yimya aika alitsü südi anungji asenok lanur karbosa Taiwan-i or research agitsü nüngdaker aser iba den repsema par aluyimba yimya karbo bener arua asen lima inyakdangtsüla iba jagi asenok mesüktepba tesendaktep tasenbaji adoktsü.