Alar tia nung dang linüba

Nisung aika alar tia nung libaer nüchi mekümnüba purtema lir. Item jagi Tsüngremia aser nisungia
yariner ser nung alar jenjang nungji dang linür. Item purtem jagi nüchi tia nung pei taküm nung kibur küma jangratema alitsüba dang nungibo alar tia nung alibajiang tajungba amai bilemer. Ibri nungertem Egypt nung küm noklang pezü alar tia nung liasü. Parnok taküm aser kibongtemji parnok mulungba nung masü saka parnok kibur Farao chuba mulungba nung dang lia aru. Parnok mapaji anogo shia parnok nem lemzüktsüba longru (bricks) yanglua arongtsübaji liasü. Iba ama mapang ka nung Tsüngremi Ibri nungertemji anitettsü atema parnok dangi Mosa yok. Mosai parnok dang alar tia nungi nüchi küma alitsü asoshi Egypt lima nungi pilar tenangzükba lima bushia aotsü asoshi ajungshi. Ajisüaka, parnoki parnok nüchi akümtsüba dang nungibo parnok kibur Farao chuba nükenang tetsübuba aküm. Anungji, parnok nüchi akümtsü agibo taküm piyong Farao mejashidaktsüi pasa tenzüka alitsü asoshiang mulungtet. Parnok Egypt nungi pilar nüchi bushia ora Farao jashitsü aser parnok dak tamajung inyaktsü ta asüba shisabolujiang nüchiso angutsüba teimla dang nungi tuluba aküm. Iba jagiang, kodang Mosa aser Aron nati Farao chuba dang pa kübok Ibri nunger alartemji par Tsüngrem külema benjong amongtsü asoshi odakjang ta ashi, Farao jashi aser Ibri nungertemji parnok mapa nung tali tekangshiba kangshia inyakdaktsü. Parnok dakji tazüka azük aser maochii benshi. Item timtemji marem Ibri nungertem jagi Mosa aser Arong dang, ” Kibubai nennok dang repranga obendangangma, kechiyong nenoki Farao aser pa tenzükertem teka nung onok tepsetdaktsütsü asoshi onok tenüng menükja nok amuoktsü,” ta kanga jashia ashiba Anitet 5:21 nung angur. Kodang Tsüngremi asenok temenen lar kübok aliba jenjang nungi nüchi küma anitetdir, ibaji melamelaabo masü, asenok temenen yariji asenok timatemtsüla. Alar tia nung aliba takümji tejashi agi sünga lir saka ibajiang asenok nem lemzüktsü ama bilema asenok iba alar tia nungji jangratema alir. Asenok mulung nung teti tetsübu aser terata lir, saka kodang alar tia nung mapang talangka lidir, joko item tetsübu aser terata ka malibo kidanga mena melitetba tensa mapanga taküm nung ajurur. Iba amaji asenoki asenoksasa asen taküm aser kibong dena raksatsüsa asen taküm libaliro tamajung kübok alarsa alir. Asenoki achiajem aser shi azü mazüoktetba ajanga asenok jashir aser akoksar saka iba tiaji toktsür aotsü tsübur. Asenok medemertemi asenok ashioktsüba aser mashileni aniba asenoki meteta lir saka Tsüngremi ashiba angaa nüchi akümtsüba dang nungibo medemer peladaktsütsübajiang shimtetter. Iba kasa tangatetba Israel nungertem dakji liasü, iba jagi parnok alar tia nung aliba nungi anitettsü merangba asoshi parnoki Mosa dang kanga jashi. Tanüa asenok aika asen dang Tsüngrem o ashiba angashir jashir , kechiyong Tsüngrem o jagi asenok tang aliba yimya aser liabaliro tamajung ajak toktsür taküm tasen küma melenshitsü ashir. Tsüngremibo asenok kanga meimer. Pai asenok temenen mapa kübok alarsa aliba tia jenjang ngua dang lir. Iba jagi asenok kümzüktsü asoshi Pai asenok dangi osangtajung abener yoker. Asenok alar tia nungsa alitsü asü mesüra alar tiaji toktsür nüchi küma alitsü ta asüba telemtetbajibo asenoksasa agitsü. Atangji, alar ka alar tia nungi salaa nüchi akümtsübaji tasak kechiyong pa dak alar kolok dang lir aser pai nüchi tia nung melidang, iba jagi alar tia aser alar mapaji toktsür tejakleni mouner. Tanü asenok aika nüchi kümnüaka alar mapa aser alar chiyongtsü apayuba agi peisasa nüchi mekümtet timtem tia nung lir. Iba nung jagi asenoksasa salar adoktsübaji, asenoki asenok madak Yisu Khrista dang kibur ta nangzüktsüla aser timtem aser takoksa arema alar tia, alar chiyongtsü aser alar mapatem toktsütsüla.