Alemla nem Governor Acharya award agütsü

June 13, 2019 nü CTS hall, Tuensang nung Changsao Thangjam Setshang (CTS)-i ayongzükba sentong ka nung Alemla Chang-i tsürtem atema skill development ajungkettsüba asoshi la nem Governor-Acharya’s award agütsüdang tangokba noksa nung angur.

Tuensang, Aami/June 14 (TYO): Chang tsürtem atema skill development ajungkettsüba atema June 13, 2019 nü CTS hall, Tuensang nung Changsao Thangjam Setshang (CTS)-i sentong ka ayongzüka Governor-Acharya’s award agütsüogo, ta Hokolbarnü ketdangsertem osang ka ajanga metetdaktsü.
Tetsürtem pei sasa mapa inyaka sen aazüktsü aser ibaji ajanga tetsürtem tashi itshitsü asoshi Alemla Chang-i tetsürtem nem tailoring, embroidery, beads making, stitching aser südakba indang angati training agüja aruba atema la nem iba award agütsüogo.
2010 küm nungi tenzüka lai category balala nung tetsürtem nem angati training agüja arudar aser Chang nunger sobaliba sobutsü balala wazüka arudar.
Lai ashiba agi, tetsürtem nem mapa agütsütsü aser lokti atema mapa tajung inyaktsü nükjidong nung lai angati training agütsür.
Iba sentong ya CTC Exe. Chairman, Chubala leniba nung agi aser tetushi tejaokerji Tuensang Deputy Commissioner, Mohammed Ali Shihab, IAS liasü.
Iba sentong nung jembidang Deputy Commissioner-i lokti dang, Alemla-i inyaketetba mapa nungi tatishitsü tajung agitsü ayongzükba den külemi, lai iba tetushi angutsü temsüa lir, ta ashi.
Kasa sentong nung Nungsanglemba, President Chang Khulei Setshang (CKS), Chingmak Chang, President Chang Gazetted Officers’ Association (CGOA) aser Chang nunger yim shia nungi tetsürtem dena liasü.