Alemli yimya tajungtem tanaben meyipa bener arudi : Kiyanilie

Kohima, July 2 (TYO) : Honibarnü KROS College, Lerie Kohima nung 6 buba Freshers’ Day ayongzüka agi aser iba sentong nung tongti tesemdangerji Social welfare & security & parliamentary affairs Minister, Kiyanilie Peseyie liasü.
Shisaliok ya nisung ka kechisarena ajaklen terenlok angutsü atema lir aser shisaliok bushidang nisung kati “quality education” kodang mamatsüla, ta tanü Peseyie-i o jembidang ashi.
“Tanü tetoktepba putu nung temulung sadokdak mali aser quality education maliba kaketshirtem ajak züngdoktsü. Anungji kaketshirtemi kanga dang meranga azüngtsüla” ta paisa ayongzük.
“Alemli mapang asen oboula nungertem dak nendaka inyakba, ochishia aliba, tashi angaba aser tantsü-tambu nem akhümtsübu agütsüba tangatetba aser yimya tajungtem liasü, saka tanübo asen loktiliba nung item tangatetba aser yimyatem sama aoer aser iba asoshi kanga sasaa bilemer. Asenok ajak longjemer item yimya tajungtem tanaben meyipa bener arutsüla” ta Kiyanilie Peseyie-isa ashi.
Tanü sentong nung KROS College principal, Imsuinla Imti-i o jembidang, tawa University Examinations nung KROS College nungi commerce nung 100% aser arts nung 87.5% takok anguba indang metetdaktsü.
Tanü sentong nungsa Students’ Council KROS College president, Royim M. Yimchunger-i tesentepertem pela agizük, Mabalamtam Konyak-i fresher tenüng nung o jembi aser Students’ Council KROS College general secretary, Daniel Konyak-i anküp tepela o jembi.