Alempang Youth Association pur office ki lapok

Mokokchung, Dec 5 (TYO): Dec 5 nü Nagaland Housing & Mechanical Minister, Wb. Tongpang Ozükümi Alempang Youth Association (AYA) pur office ki tasen asüba ka meraketa lapoktsüogo. Iba office ki meshiteta Alempang Baptist Arogo Pastor, Rev. Temsü S-i sarasademtsü.
Iba sentong nung Tongpang Ozükümi jembidang, Nagaland ya lokti tentet lima ka lir saka lokti aikadi lokti tentetba nükjidong tonga meinyaker, item lokti ajak jagi nükjidong ataloka inyaker asübo Naga lima koda jungla, ta ashi.
Alempang Youth Association yabo nükjidong ataloka inyakba telok ka lir, aji oda, koba loktii nükjidong tonga aser nübur tejakleni aotsü asoshi awa oa inyaker, item lokti denjibo teti amalitepa yaritsü aser amaliteptsü mulunga lir, ta pai ashi. Nüburtem atema mapa tajung inyaka tangar asoshi tatishitsü sayuba ward ka asütsü asoshi paisa ayongzük.
Iba sentong nung AYA tir Bendangtoshii tarurtem pelaa agizük aser Alempang Ward Yimden Chairman Lemasashii tepela o jembia liasü. Iba office ki yangertettsüsa Minister Tongpang Ozükümi senotsü teyari tulu agütsüba asoshi AYA ketdangsürtemi pelaba lemsatep.