Alenseta südaktsüba yimya melentsüla asü ?: Supreme Court

New Delhi, October 06 (Agencies): Hokolbarnü Supreme Court-i Centre sorkar dang, tasüba temerenshi- alenseta südaktsüba yimya ya melenshitsü asü ta asüngdangba atema telangzüba agüjang, ta metetdaktsü.
Supreme Court-i legislature dang, tasüba temerenshi atema obendang agüja alibapurtem koba yimya nung südaktsütsüar telangzüba ita asem tsüngda agüjang, ta metetdaktsü.
“Item temepishiba angadangba mapang nung Supreme Court-i, asen linük temzüng nung taochi keta lir, aser taküm ka akhümket züngshir, ta ashi. Tanü putu nung yimya balala melenshiba nung ajemdaker tasüba temerenshi angutsüpur koba yimya nung südaktsütsüar legislature-i bilemdangtsü akok,” ta Supreme Court-i ashi.
Supreme Court nung benoka aliba temepishiba nungji yamai shia lir- linük temzüng kübok Arrla 21 (Right to Life) nung, tasüba temerenshi angutsüpuri timtem kangabo majangshitsü asoshi aija aliba tepoukdak alir kati temerenshi yimya shimtsü temeten lir.
Chief Justice Dipak Misra aser Justices- AM Khanwilkar aser DY Chandrachud nungeri akumba bench-i Centre dang iba temepishiba nung ajemdaker hopta asem tsüngda telangzüba agüjang, ta metetdaktsü.
Temepishiba shidi agütsüsang, Lawyer Rishi Malhotra-isa Supreme Court obendang balala ajanga aibelener ka lisü agi tekong nung alenseta südaktsüba yimya aitsü.
Ajisüaka Criminal Procedure Code kübok ozüng ka ajangabo tasüba temerenshi angutsüpur kaji lisü agi tekong nung alener alenseta südaktsütsü atema shia lir.