Aleppo nung meraratsü tezüngzüktep agi

Aleppo, May 05 (Agencies): Russia aser US nati ajungshia, Syria sorkar aser sorkar anemertemi Syria kübok Aleppo yimti nung anogo 2 tashi tongpang meraratsü tezüngzüktep ka agishiogo.
“Tanep, Brehostibar anepdang 1:00 ako nungi tenzüka taruba ghonda 48 tashi Aleppo yimti nung tongpang meraratsü tezüngzüktep agiogo,” ta Syria mitkar lenir kati osang jangjashitsü.
Tan agiba tongpang meraratsü tezüngzüktepji mapa küma inyakdaktsütsü nükjidong nung tetendangertem Aleppo yimti yokba osang ka Russia’er defence ministry-ia metetdaktsüogo.
“Tesem kar nung tongpang raraba osang angazükba dak alaka, Syria kübok Aleppo nung Syria sorkar aser sorkar anemer na tsüngda tongpang rarabaren anenogo,” ta US Secretary of State, John Kerry-ia metetdaktsü.
Paisa ashiba agi, tongpang meraratsü tezüngzüktepji Aleppo yimti nung dang masü saka Syria linük ajunga nung agitsü nungdaka lir kechiyong yamaji inyakba ajanga dang Syria nung yimji yimjung litettsü.
US aser Russia nati ayonger külen Syria sorkar aser sorkar anemer na tsüngda tongpang meraratsü tezüngzüktep ka taküm  February ita 27 nüa agia liasü.
Kerry-i taoba Deobar nüa Switzerland kübok Geneva yimti semdanga Syria asoshi shimba United Nations (UN) ambassador, Staffan de Mistura dena ajurutepa Syria den sentakba onük benoka jembiba osang angazükogo.
Mistura-ia Kerry den ajurutepba sülen Russia yimtiba, Moscow bushia oa Russia Foreign Minister, Sergei Lavrov den ajurutepa senden amenba osang jangjaogo.
Küm 5 tejaklen nungi tenzüka Syria nung mangatettep adoka tongpang kanga sashia raraba ajanga tanü tashi nung nisung 270,000 dak tema asüba aser nisung million aikati pei talidak toktsütsüsa akümba osang bushiteta lir.