Alexander Zverev o John Isner na final asayatsü

Miami, Metsüremi 31 (Agencies): Miami Open asayamung Rogonü (Friday) tebur kija semi-final asaya nung Germany nunger Alexander Zverev-i Spain nunger Pablo Carenno Busta madak 7-6(4), 6-2 agi takok ngua final tongtetogo. Alexander-i America nunger John Isner den final asayatsü jangjaogo.
SF asaya mezüngbuba set nung Busta-i kanga junga asaya tenzük aser mapang tatsüka atema pai point timba ngutetta asaya liasü saka Zverev-i tajungba asayateta mezüngbuba set akok. Tanabuba set asaya nung Zverev-i serve kanga junga oteta point aika angu aser seed 16 buba nung alisang Busta indang serve anaben tashi ‘break’ süja takok ngutetogo.
“Mezüng set asaya tetenzüklen ni kanga junga asayar ama bilema liasü saka ni aika nung aibelena liasü,” ta Zverev-i ashi.
Tena asaya mezüng set ‘tiebreak’ nung Zverev-i ‘backhand’ ajanga set point ka ngua takok angu
Tanabuba set tenzüker ‘game’ tasembuba nung Zverev-i Busta indang serve ‘break’ asü aser game tenet buba nunga paisa ‘break’ süa liasü. Iba semi-final asaya Crandon Park nung asaya aser minute 88buba nung tembang.
Arishi küm 20 tain Zverev-i seed 14buba nung alisang Isner den Amungnü (Sunday) final asaya nung takok angu nungbo pai ATP Tour title tenetbenbuba aser Masters 1000 asayamung takok marok tasembuba angutsü.
Kasa asayamung tebur semi-final asaya tanga ka nung America nunger Isner-i Indian Wells asayamung nung takok angur Argentina nugner Del Potro 6-1, 7-6(2) agi koktetta Miami Open final nung mezüngbuba asyatsü maongka ngutetogo.
Iba asaya mezüng set nung Isner-i ‘serve aser groundstrokes kangajunga asaya minute 27 nung Potro madak takok angu.
Tanabuba set nung asayar anapronglai melentepa ‘serve’ kanga dang akhanga süa liasü. Tia makai Potro-i pa den toktepsang memenep aser Isner-i ‘tiebreak’ koktet.
“Ni maneni dang junga asaya arudar. Ni amanger tanü asayaba ya kü atema tajungtiba alitsü aser iba yagi ni kanga ajungmesor. Tang tashi nung kü temmang nung timtem kecha mali aser final asayatsü atema ni renema lir,” ta Isner-i ashi.