Alexis Sanchez Inter Milan-i aotsü renema lir

Luroi/August 28, 2019 (Agencies): Manchester United nungi asayar Chile forward Alexis Sanchez, loan nung Inter Milan nung oa adentsü renema lir, ta Italian newspaper Gazzetta dello Sport-i Mongolbarnü sangdong ka ajanga metetdaktsü.
Osang kaket ajanga ashiba agi, iba tenangzüktepba ya loan atema dang lir aser permanent transfer atema kecha tenangzüktepba agia mali aser United puri asayar itasen nung teyari agütsütsü.
Arishi küm 30 tain asayar ya Arsenal nungi United nung 2018 küm January ita arua aden saka junga masayateti arudar.
Old Trafford-i aruba sülen pai asaya 32 nung goal asem dang idakja lir aser pa club toktsür aoba ya taoksatsü osang ka masü.
Inter-i aoba sülen Sanchez Belgium nunger forward Romelu Lukaku den maneni külemi asayatsü, shiba iba ita United nungi Inter-i ogo. Pa atema Serie A club yagi euro million 80 shi agüja liasü.
Chile nunger asayar ya Barcelona-i mao tsüngda Udinese nung asayaa liasü aser iba sülen Arsenal-i aru, kong pai asaya 166 nung goal 80 idaktsü aser 2015 aser 2017 küm FA Cup akokba asaya nung goal idakja liasü.