Alezo Venuh-i NIA indang ‘most wanted’ osang jangatsür

Kohima, Mongputeni (October) 23 (Agencies): India nung telungpur teloktem nung züngsemtem ‘most wanted’ ta sangdongba nung Alezo Venuh aser K Mulatonu na dena lir ta osangkaket ka nung adokbaji magizüker ta GPRN/NSCN-i ashi.
National Investigation Agency (NIA)-i nisung 258 indang tenüng metetdaktsü aser iba ‘most wanted’ tarensen nung NSCN (K), NSCN (IM) aser tanga North East teloktem nungi lennirtem dena lir.
NIA-i ‘most wanted’ sangdongba nung kü tenüng densemba atema süngmanger, ta Alezo Venuh-i ashi.
Pa ya Envoy to the collective leadership, GPRN/NSCN lir aser ano NNPGs indang Working Committee (WC) aser India sorkar tsüngda olemtep nung Coordinator inyaker.
June 4, 2015 nü Manipur kübok Chandel nung Indian Army amakba sülen NIA-i pa den K Mulatonu na iba tatalokba nung dena lir ta tai tongloktsü, ta Alezo-i ashi.
NIA-i aibelena tena nem tai tongloktsü aser iba sülen parnoki yakta dang tiyazü nung tai tongloktsüba atema tatok meshi.
Chandel nung atalokba nung küna kecha shilem maliasü aser iba lendong atalokli Guwahati nungi NIA ketdangsertemi küna (Alezo aser Mulatonu) dang asüngdangya asü aser tesendaktep kecha maliasü ta kuli metet, ta Alezo-isa metetdaktsü.
“Iba sülen NIA-i küna indang osang jangjashitsogo. Anungji ni iba tatalokba nung sendaktepa mali sernung NIA-i parnok indang website nung ‘most wanted’ tenüngtem nung ni dendaktsütsüsa kuli kecha mali” ta paisa shisem.
India sorkari Naga yimten tebilemtsü ta olemtep aser jembishinü ajanga dang latettsü ta angatetogo. Onokia onok tajungtiba agi inyaka arudar aser India sorkaria tekaratiba nung Naga yimten latettsü atema inyakdar, ta Alezo-isa ashi.
Nagaland nung local media-i mapa tajung inyakba atema tenüngsang agütsür aser India sorkar o NNPGs indang WC tsüngda olemtep agiba nung shilem tajung agitsüla, ta paisa shisem.