Algeria nung ketdangsertemi tekülem ki ka shibangtsü

Tizi-Ouzou, Aenjeti/Jan. 03 (Agencies): Algeria nung aliba yimtsüng ka nung pastor ka dangi December 30, 2018 anogo par tenlaki shibangtsü tetoyuba osang ka yoka liasü.
North-central Algeria nung aliba Tizi-Ouzou nungi kilometer 45 bilar aliba Ait-Jimaa yimtsüng nung tenlaki ka shibangtsü asoshi iba Muslim linük nung ketdangsertemi kanga meranga aru, saka 2017 küm Pastor Rabah Messaoudi-i okadak takok ngua liasü. Saka Ait-Bouadou Commune (County) tekolakba aser Kabylie Region nung aliba Tizi Ouzou Province ketdangsertemi iba tesem nungi Khristanpur ajunga aridoktsü temulungtetba tulu nung ken o ya court dangi tanaben aben, ta osang ajang ashi.
“Iba ken o jembiba mapang obendang ya par busema agütsü, kechiaser par okatsüri senotsü teyari meshi aser ibaji obendangeri memulung,” ta pastor indang okatsür, Nadjib Sadek-i Morning Star News dang ashi.
Ait-Bouadou ketdangser aser pa indang okatsür pongui Algeria nunger 2006 küm tamangba yimsü temzüng yanglua aliba amshi, koba dang Law 03/06 ta ajar aser iba temzüng ajanga tekülem ki shibangtsü shia lir aser Muslim nunger masüba tekülem ki ya sorkar kübok züluoktsüla, ta shia lir.
Ait-Bouadou ketdangsertemi Pastor Messaoudi dang 2016 küma Khristan yimsü dak sendakba maparen ajunga anentsü shia liasü, aser iba tekülem ki ya nisung alitsü asoshi temelaba agüja lir, ta parnoki nokdak. Iba tekülem kidang adener nisung kar ajanga kuli tejangja agütsüba sülen ketdangsertemi February 18, 2016 nung iba ki shibangtsü totuyuba agüja liasü.
Saka Pastor Messaoudi aser arogo lennirtem den Protestant Church of Algeria nungi ketdangsertem teyari ajanga iba totuyuba sülen manidaktsü, ta nokdaka aru.
December 30, 2018 anogo iba tekülem ki shibangtsü totuyuba agütsüba ya Boghni nung aliba office kati jaoker agütsü. Iba ki shibangtsü asosho obendang ya October 26, 2018 anogo Tizi-Ouzou nung aliba administrative court ajanga agütsü.
Algeria nung Islam yimsü ya kanga metsünga reta amanger aser nütsüng yongsük million 40 aliba iba linük nung Muslim nunger shilem 99 lir. Saka 2000 küm sülen Algeria nung Muslim nungertem aika Khrista dangi temulung meyipa arudagi.