Algeria nunga Castro atema anogo 8 nü mang yima amungtsü

Algiers, November 27 (Agencies) : Tesüiba mapang Cuba Tir Fidel Castro asüba sülen Honibarnü Algeria Tir Abdelaziz Bouteflika-i linük nung anogo 8 nü pa mangyima amungtsü metetdaktsüogo.
“Deobarnü nungi tenzüka anogo 8 tashi linük nung Fidel Castro Ruz mangyima amungtsü osang ya Honibarnü Tir Abdelaziz Bouteflika-i metetdaktsü,” ta Tir office nungi sangdong ka ajanga ashiba APS news agency osang ajanga metetdaktsü.
Bouteflika-i tang Cuba nung Tir, Raul Castro Ruz dangi asüku lemsatepa shidi ka zülu. Pai, Fidel Castro asübaji Algeria nunger atema kanga takoksa tulu lir, ta shidi nung züluba Xinhua news agency osang ajanga metetdaktsü.
Paisa, Algeria nunger France-i amokbanger aliba anema raraba, Algerian Liberation War (1954-1962) mapang Castro-i kanga yariogo aser pai Algeria linük nüjiso anguba sülen raradang takoksa ajuruba tanaben nokdaktsü merangdang nungita yaria liasü, ta shisem.
“Ni pa nem tetushi agütsür kechiba süra pai linük yimjung, akhüm aser nüjiso kümzüka yutsü. Pai nüburtem temeden atema marendaki rara,” ta asüku lemsatepba osang nungjisa shia lir.
Fidel Castro ya Hokolbarnü arishi küm 90 nung asü. 1959 nungi 1976 tashi pa Cuba Ato Kilonser inyakba sülen ano 1976 nungi tenzüka 2008 tashi linük Tir-a inyak.