Algeria yimsüsürtemi linük temzüng melenshir

Algiers, February 08 (Agencies): Algeria linük yimsüsürtemi linük temzüng melenshitsü onük yashi, Deobar nü agizükogo.
Yimsüsür ka nem linük Tir menden tanabenren dang bendaktsütsü temten agütsütsü aser Berber oshi linük oshi kümdaktsütsü densema linük temzüng yanglushitsü onükji North Africa nung tentetba Algeria linük yimsüsür 499-i agizüka liasü.
Ajisüaka, kasa onükji parliament yimsüsür anati magizükba, parnok 16-i vote agütsütsü sentong nung shilem magiba aser yimsüsür ishikati vote agütsütsü sentong züdoka yutsüba osang angazükogo.
Arishi küm 78 tain Tir Abdelaziz Bouteflika nem linük Tir menden asembren abentsü temeten agütsü nükjidong nung 2008 küm yanglushiba linük temzüng tan ano yanglushir lir.
Ano, tan linük temzüng melenshiba sülen linük Tir-i parliament nung yimtenren telok tulutiba nungi linük Ato Kilonser shimtsü oceta enoksemogo.
Tan melenshia yanglushiba linük temzüng nung kecha agi alena maliba electoral commission ka tentettsü oceta enoksema lir.
“Tan linük temzung melenshia yanglushiba ajanga linük nem tajangzük bener arutsütsü imlar. Ajisüaka, mitkar aser yimsüsütsü tashi abenba FLN yimtenren telok indang tashi ajemtsütsüsa yimtenren telemenshi densema mali,” ta opposition teloktemia metetdaktsüogo.