Ali alidak alitsüla

Tan ita tetenzüknü alima ajunga nung teintet rogotem anogomong amongba sülen ABAM kübok Ao arogotem nunga mezüng Deobar nü teintet rogotem  nem akümtsübu agüja amongba ajanga asenok nem moatsüba temoatsütem tali tejangjaba nung züngdangtetter. Asenok akaba ali rongsen aika liaka, item rongnung tematiba aser tulutiba temoatsüjibo tsüraburtem arshia aliba temoatsü ya asütsü. Arrshia alir tsüraburtemji kaketreju nung azüngba kakettem dang nungi sentiba aser osep kaket dang nungi tajungba lir. Parnok dak tajangshiba aser temetetba aika lir. Itemji tarutsü putu asoshi leniba ajok asünungji teintet rogotem dang nungi lanurtemi temoatsü meshia anidaktsübaji kanga tongtibang mapa ka asütsü. Atangji, tientet rogo züngaji tasoba küm 60 ser tema nungi züngoker asünungji, teintet rogotem aika lanurtem dang nungi temang aser tekolok tekümkümba jenjang nung aliba angur. Item purtemji tenükshitsüka lir. Teintet rogosa süaka sorkar mapa nung masü saka peisasa apitetba mapa tapu balala nung inyakertem asoshibo mapa nung anenba anogo maka pei tashi agi akok tashi inyaktsü. Ajisüaka, sorkar mapa nung inyakertem asoshibo mapa nungi anentsüba anogo ka latetja lir. Anungji, tasoba küm 60 junger anentsüsa lateta akaba limatem nung sorkar mapa nungi anisüngzük agirtemji ano tantsür tambur maküm tajungdang amai mapa nungi anener. Ajisüaka, küm metsü-semer inyaka aruba mapa ka tain kümer toktsür asünungji, aikati sorkar mapa nungi anenbaji joko temang nung tashimait leni mao tantsür tambur kümer amai bilemer. Iba jagi aikati sorkar mapa nungi anener külen inyaktsü sentong kecha meyanglui dang ajungbena anener amai dang anener. Ajisüaka, jungjunga bilemdangra, anema alirtem asoshibo taküm  shitak jungjunga lia aotsü asoshibo sorkar mapa nungi anener dang tenzüker. Sorkar mapa inyakdangbo talenba ka kübok ayanger dang asünungji mapa tajung tuluka inyaknüa bilemyonga meinyakteter. Sorkar mapa nung inyakba takoksaji aji lir. Ajisüaka, ano sorkar mapa nung inyakba tajangzükji mapa nungi anendang sen chikusünga angutsü, anungji iba jagi teinyakner aser shisa lentong tajung yanglutetter asoshibo mapa tasen tuluka tenzüka inyaktettsü. Tanü tia kar maka ka, nisung aikati Dimapur linür saka Dimapur ama lima ya kazütsü purtem atema masü saka shishilembartem asoshi lenjem tongtibang ka lir. Aji oda, nisung aikati sorkar mapa nungi anener külen pei pension sen ajak agi Dimapur nung kimong tilaka alir ki yanglur yangji kazüa amonger. Ano, nisung karbo alibo alitet saka ki merenemtet mashi mashi ka nung lia pei arishi atemer. Aji oda, temang nung asentzü endoka inyakdi asüyonga alubo yutsür ki temeket nung atsüa tilakata mali anogo shia chiyongli kazüli asüba agi tebok chizüker temang nung tashidak keter tarazüka marakzütet pei taküm atemba otsü aika alitsü südi. Aji oda, Dimapur nung alu ayimtsüsa ali mekara mesüra factory lapoka alitsüsa mekokra mesüra business lenmang tajung ka yateta melira, kazütsü atemabo Dimapur mebushitsüla, kechiyong Dimapur ya kazüba lima masü. Dimapur nung pension sen ajak agi ali tilaka alir yangji ki tilaka sür kazüa taküm süitemdaktsüba dang nungibo mapa nungi anendang anguba sen ajak bener yimtaki orr yangji ki tajung ka yanglur pei li nung pei yimnüba lu yima alibasa noklangben agi tajungba asütsü. Asen tetsü taso lima nungbo asen meyong kimong aser alu lir, anungji sen endoka malitsü. Ano, aliyonga sen tasak masü, anungji sen ishikati ali tuluka alitettsü. Aji oda, teintet rogo ka kodang sen bener oa yimtak pei ki südir aser yangji lia alu yimdir iba jagi yimtaklirtem aser lanurtem ajungmesotsü. Teintet rogoji teintet rogo, parnokji meintetter atema tesayur aser ajok. Iba tangatetba nung teintet rogotemi mapang anogo ka ta amajok nung meindoki teintet rogotem kibong aser lokti tentet ajak den ajurutepa iba ama shisatsü lemsatepera, ibaji tarutsü putu asoshi temoatsü asütsü.