Ali aser Alizüng -T.Ken 103: 13-18

Aseni teti amadokba asen Tsüngremi teti bilemtetter. Ken Pai asenoki bilemtetdaktsünüba asenoki amadoker, aser asenok timtemi aier. Na kechi agi yanglu nai menur bilemtet asü? “Tebui pei chirtem dang aochiba ama, yamaji Kibubai pa tsübubatem dang aochir. Kechiyong asen kechi agi yanglu pai metetter; asenok ali dang ta bilemtetter” (t.13,14). Tsüngremi ali agi Adam dak taküm tangula apuoktsü, aser Pa akümlir ka aküm. Asenok temang ali nungi yanglu. Saka asenok dak Tsüngrem noksa lir, kechiyong asenok Pa mesükba nung yanglu.
Kodang asenoki auyi indang bilemdir ibai tongtipang ama asenoki mebilemer. Nai ajaklen, kilung, kima aser kidang oset ajak nung aoyi angutsü akok. Auyi jagi tashi mait indang jembir. Saka ano iba yagi tashi balaka aliba indanga jembir. Tsüngremi asenok auyi nungi yanglu anungji asenok dak tashi mait alitsü akok saka Tsüngrem tsüngdang tashi tait lir. Tsüngremi auyiji agi, aser lishi yanglu aser nisung ka yanglu. Kong auyi lir idakji inyaktettsü tashi lir. Pa poteper aser asenok ajungli.
Nai ashitsü akok, “Kibuba, Nai ni auyi nungi yanglu saka inyaktettsü tashi agi sünga yanglu. Ni kü sasa tashi mait saka Ne dak tashi tait lir. Ni ata alidang, agütsüdang aser ajem ajema alidang meshitetjang aser Nai mulungba ama yanglujang.” Pauli ashi, “Khrista shibai ni tashi itdaktsür, pa ajanga ni ajak inyaktsü akok” (Fil. 4:13). Pai ano ashi, “Saka ain tulubaji onok meyong asütsü asoshi iba rongsen onok ali po nung kar” (2Kor. 4:7).
Kong auyi lir, idakji inyaktettsü tashi lir. Kong lishi lir idakji aintsü asoshi mapang tajung lir. Ne taküm nung Pa teyangluba inyakyim nem maneni agüjang. Pai mulungba nung yanglutsü asüngdangang.