Ali atsünga agiba khuret ajanga Dimapur Railway station nung timtem ajurur

Dimapur, August 18 (TYO) : Dimapur Railway station ulushitsü indang mapa inyaktsü atema Railway ministry nungi sen nguaka ali atsünga agiba khuret ajanga iba mapa meinyakteter.
Küm ishika tejaklen nungi railway authority-i Dimapur railway station nung tobur jungdaktsütsü aser terenlok mapa inyaka arur, ta tanü Divisional Regional Manager, Lumding, Pankaj Jain-i osangbener dang ashi.
Dimapur railway station nung tang aliba Platform No. 2 ulushitsü aser kilem dena yanglutsü atema ministry ajanga sen lemzükja lir. Ajisüaka, nisung kari okadak PIL benokba ajanga iba mapa meinyakteti lir, ta paisa ashi.
Dimapur district administration ketdangsüba kübok Railway ketdangsertemi railway li atsünga agirtem meindokogo. Ajisüaka, nisung kari okadak iba anema PIL benok aser ken o 8-9 ben shi angadanga aruogo. Taruba hearing ji August 31, 2016 nü alitsü aser iba dak sendakba nung railway authority-i state sorkar dang nungi tezüluba nung kulitem meshiogo.
Osangbenertemi Dimapur railway station nung BG Express aser Nagaland Express train indang coach merükb facility atema asüngdangdang, DRM Pankaj Jain-i kobi melii ibaji tenzüktsü ta langzü.
Dimapur railway ketdangsertemi Dimapur railway station tajungba akümtsü aser nüngdakbatem indang osang DRM, Lumding dangi mesüra dimapurrail@gmail.com dangi yoktsü mepishia metetdaktsü.
Tanü DRM Pankaj-isa Dimapur railway station nung air conditioned Upper class waiting hall lapoktsü.