Ali kibur onüktem ajanga sorkari timtem ajurur: Vikheho

Kohima, June 16 (Agencies): Public Works Department (Roads & Bridges) Minister, Y Vikheho Swu-i, Tuensang district, Noklak sub-division kübok International Trade Centre (ITC) Pangsha ya National Highways ana den sentakteptsü, ta metetdaktsü.
State nung National Highways tasen ana Pangsha den sentakteptsü alibaji- Showuba-Guzunyu-Pughoboto-Zunheboto-Ahubanto-Shamator-Noklak-Pangsha aser Gandhi Ashram, Chuchuyimlang National Highway-2 nungi Pangsha lir, aser iba ya Union Ministry of Road Transport & Highways-i agizükogo.
June 13, 2016 nü National Highways tasen ana Pangsha den sentakteptsü agizükdang Union Ministry of Road Transport & Highways (MoRTH)-i, ibaji Department-i Detailed Project Report (DPR) renema agütsüba dak keta lir, ta metetdaktsü.
Mongolbarnü Vikheho den Health & Family Welfare Minister, P. Longon aser Chief Engineer PWD (R&B), Krosü Rhetso nungeri ITC Pangsha semdangba mapang Vikheho-i item osang metetdaktsü.
Iba dak sentakba nung tesasaba olen ka lemsatepdang  Minister-i, “Ali kiburtem dak sentakba onüktem ajanga state-i timtem jenti ajangshir,” ta ashi.
Ali kiburtem dak sentakba onüktem ajanga sorkari terenlok mapatem meinyakteter ta shia pai, “Iba ya sorkar tai masü saka Naga nüburtem ajanga lir,” ta ashi.
Minister-isa, item tesem nung shisa takartem ama Highways-i ITC Pangsha den sentaktepba tesemtem nung nüburtemi timtem madokdaktsütsüla, saka sorkar nungita yaritsüla, ta ashi.
Ano külen local lenirtemi Chendang Saddle-Noklak jila  gari lenmang tajungba küma yanglushitsü atema mepishibaji tekaraba nung reprangshitsü ta minister-i shiogo.