Ali rongsen agitettsü atema shisaliok tajung nüngdaker: Acharya

Convention Centre, Kohima nung Horticulture Department küm 25 ajungba Silver Jubilee souvenir sayatsüba sülen state Angh,  PB Acharya aser Parliamentary Secretary Kejong Chang den department ketdangsertem külemi tangokba noksa ka angur.  (Kohima, April 27, 2017)

Kohima, April 27 (TYO): Briohostibarnü Capital Convention Centre, Kohima nung Horticulture Department küm 25 ajungba Silver Jubilee mung mungogo, aser iba sentong nung tongti tesemdangerji, Nagaland aser Arunachal Pradesh Angh, P.B. Acharya liasü.
Tongti tesemdanger o jembidang Angh-i, Nagaland nem ali temo moaja lir, iba den külemi anü tashi, mineral, totzü, hydro, mozü yangluba süngolio densema ali nungi adokba rongsen moaja lir, ajisüaka item rongsenji agitsü atema shisaliok tajung nüngdakba den külemi aluyimertem nem training agütsütsü nüngdaker, ta metetdaktsü.
Iba dak sendakba nung Angh-i department dang aluyimertem indang facilities aser welfare projects atema inyaktsüla aser item scheme ji aluyimertem ket tongtsütsüla, ta metetdaktsü.
Paisa, iba nungji aluyimertem jenjang majungkettsüra parnoki züsentetba jenjang majungtsü mesüra state kecha nunga rongsenkettsüng jenjang majungkettsü, ta ashi.
Tesasaba olen ka nung Angh-i, tang tashi Nagaland-i parnok peritsüsa mezüsenteter saka chiyungtsü aser shi atema tanga state tem dak metaloker, ta ashi.
“Nagaland state nem ali temo moaja lir aser süngjanglijang balala den aonsotsü balala tsünütsü atema tsüngsang-mopung tapet moaja lir, anungji department-i mozü mamshii adokdaktsüba aonsotsütem züsentetba jenjang tajungba kümdaktsütsü atema inyaktsüla aser züsentetbatemji shishilembatsü atema ajungshitsüla,” ta paisa ashi.
Angh-i horticulture ketdangsertem danga, iba dak alia langka inyaktsü nenok dak imlar, koba ajanga department jenjang temabai atutsü, ta ashi.
Angh-isa, Nagaland nung nütsüng lakh 20 shi nungi graduates lakh 3 shi dang lir, saka graduates timbaka tanga state tem nung inyaker, aser tanga state tem takar kümdaktsür, ta ashi.
Pai ashiba agi, tanga yimtitem nung inyaker lanurtem atema yangi mapa maongka bushitsütsüla, aser iba atemaji ochimashi ajema kümdaktsütsüla, koba ajanga parnok state-i meyipa arur mapa meranga inyaka Nagaland ya tashitait state ka kümdaktsütsü.
Angh-isa Horticulture Department küm 25 ajungba souvenir sayaja liasü.
Kasa sentong nung Horticulture Parliamentary Secretary, Kejong Chang-ia state nung tanga department ajak dang horticulture department ya tongtibang department ka lir, anungji department ajaki nungita yaridaktsüner, ta mepishia metetdaktsü.
Jubilee benjungmung sentong ya Horticulture Department Secretary, Alan Gonmei leniba nung agia liasü aser NBCC Youth Secretary, Rev. Vikuo Rhi-i sarasadema sentong tenzüka liasü.
Horticulture Department indang Garden Band-i ken ajanga shilem agi aser Horticulture Joint Director, Dr. R.E Lotha-i tepela anküp o jembia liasü.