Ali tenla agütsür nem sorkar mapa agütsütsü: Meghalaya CM

Shillong, August 06 (Agencies): State nung terenlok mapa balala atema sorkar nem ali tenla agütsürtem nem mapa agütsütsü asoshi benokba onük ka Cabinet-i agizükogo, ta Meghalaya Chief Minister, Mukula Sangma-i metetdaktsü.
Osangbenertem den jembidang pai, “Sorkar nem ali tenla agütsürtem nem sorkar mapa nung Grade-III aser Grade-IV post agütsütsü atema onoki agizükogo,” ta metetdaktsü.
Sangma-isa, ano nija ali kiburtem nungi kibongtemi ali agütsüba atema sorkar mapa agütsütsü, aser lokti tentet balalai ali agütsüba atema item telok nungi temsüa alirtem shima mapa agütsütsü, ta ashi.
Cabinet-isa, state personnel department-i matamabensartem department balala nung mapa wazüka yutsüba ajungkettsü atema benokba agizükogo.
Maneni state tenüng nung tangalen saisaponga state nem konang nüngsang bener arutsür saisapongertem nem sorkar mapa shilem ana wazüka yutsütsü Cabinet-i agizük.
Cabinet-isa “Meghalaya Protection of Interests of Depositors Financial Establishment Bill, 2017” agizüka liasü.
Iba bill ya September nung Assembly alidang benoka agizüktsü, ta Chief Minister-isa metetdaktsü.