Alia Bhatt-i ajak meteta lir : Shahid Kapoor

Mumbai, September 18 (Agencies) : Bollywood actor Shahid Kapoor-i ashiba agi Alia Bhatt-i memetetba kecha mali aser la arishi küm 56 tain ka ama lir.

“Alia Bhatt arishi küm 22 dang saka la arishi küm 65 tain ka dak aliba shisatsü keta lir. Anungji lai memetetba kecha mali. Lai ajak rajema lir aser iba jagi kechisarena ajak atema telangzüba meteta lir. Nenoki la dak ajak asüngdangtettsü” ta Shahid-i ashi.

Taoba mapang film yanglur Karan Johar indang talk show ka nung Alia-i taoba Maharashtra chief minister Prithviraj Chavan ji India tir ta ashi aser iba sülen nisungtemi la tilutsütsü tenzük.

Laisa asayamenü video tatsü ka nung shilem agi aser idakji lai general knowledge nung tamakok anguba sayua lir.

“Alia-i ajak meteta lir. La tasüngdangbatem atema telangzüba renema dang lir aser la dang jeretpera asüngdang. Ibaji masü nungbo la sasa tasüngdangbatem asüngdangtsü aser telangzüba shir oadoktsü” ta paisa shisem.

Shahid-isa ashiba agi, Alia-i pa dang nungi timba film nung shilem tajung agiogo.

“Ni joko küm 12 film nung shilem agia aru saka labo küm ishika dang. Ajisüaka, kü dang nungi lai shilem tajungba agiogo” ta Shahid-isa ashi.

Shahid aser Alia nati Vikas Bahl-i direct asüba film Shaandaar nung külemi shilem agi aser iba film ya October 22 nü sayatsü sentong lir.