Alia Bhatt-i ‘Takht’ nung shilem agitsü mulunger

Aenjeti/January 03 (Agencies): Bollywood nung tongtibang star ka ama, actress Alia Bhatt-i telemsa balala (genre) aketba film tem nung tongtibang shilem agiba ajanga la sempettem tali dang alimai jangjaa akümer.
Film industry nung actress tasen Alia, shibai nüngtugu aser ajaki jangratema agizükba film ‘Raazi’ nung shilem agiogo, tang lai la indang taruba film ‘Gully Boy’ koba Tsüklai 2019 nung sayatsü lir, iba atema lai ternemba tulu nung yongyaa atadar.
Kasa mapang Alia-i Karan Johar indang taruba ‘Takht’ film nung shilem ka agitsü asoshi tejangraba lemsatepogo.
Film ya Mughal yimsüsür/chuba Aurangzeb aser pa adianu Dara Shikoh na tsüngda tesendaktep mekonga aoba indang otsü nung ajemdaker yanglutsü. Karan Johar indang mezüngbuba putiotsü film nung nüngtugu bollywood star Ranveer Singh, Vicky Kaushal, Anil Kapoor, Janhvi Kapoor, Bhumi Pednekar, Kareena Kapoor Khan aser Alia Bhatt nungeri shilem agiba angutsü.
Film nung Ranveer-i Dara aser kasa mapang Vicky-i yimsüsür tesashi Aurangzeb shilem agitsü, ta osang ajanga metetdakja liasü.
‘Raazi’ film nung Vicky den külemi Alia-i shilem agiba sülen iba project nung tena tanaben longjemtsü.
Tawa interview ka agiba mapang, Alia-i film script mazüngdang yongi iba project nung shilem agitsü mulungtetba, lai lemsatepogo.