
Dimapur, May 30 (TYO) : Aliba, Chungtia aser Kinunger yimtsüng asemi Mokokchung aser Mariani (NH702) lenmang nung kilometer 35 tashi yanglutsüogo.
Iba lenmang ya Mokokchung district atema dang masü saka Tuensang aser Zunheboto district tem atemaa kanga tongtipang lenmang ka lir aser yim asemi 10C Junction nungi Longjongkong (New Camp anasa) tashi lenmang yanglushi.
Iba mapa tajung atema Mokokchung Chamber of Commerce & Industries (MCCI) aser Ao Kaketshir Mungdang (AKM) ketdangpurtemia tenüngsang agütsüogo aser tangaria iba mapa tajung ajizüka inyaktsü parnokisa ayongzükogo.
Ano, Ao Senden Tir, Imolemba aser Tongti tezülur, S. Panger Ao natia sangdong ka nung yimtsüng asemi mapa tajung inyakba atema tenüngsang agütsüba metetdaktsüogo.
Iba mapa tajung ya tatishitsü ka dang masü saka sobaliba tajung ka ta agizüka loktiliba ajangzüktsü atema inyaktsüla, ta AKM mendenpurtemisa nübortem ayongzükogo.
Bangdakpurtemi iba lenmang anepalu masüba ajanga district asem nung alirtem mapang talang ka timtema aruogo, anungji state sorkar dang iba lenmang tongti süa anepalutsü ayongzüker, ta Ao Senden-isa metetdaktsü.
Gari lenmang yanglushiba mapa nung Aliba, Chungtia aser Kinunger yimtsüngtem nungi nisung 1135-i nübo agüja shilem agi.
You must be logged in to post a comment Login