Aliba nung Vacation School ka kaogo

Mokokchung, June 12 (TYO): Tang mezüng Mokokchung district kübok Aliba yimtak sentong tasen ka June 7-11 angogotem nung kaogo.
Lanur tejangrar kar longjemer Aliba yimtak ‘Vacation School’ ka kaja iba yimtak tanurtem dang English Phonics aser Life Skills sayua liasü.
Iba sentong ya N. Jamir aser Limaonen Imchen na leniba nung Aliba Student’s Union aser Village Council nati yaritepa agi.
‘The Reluctant Daughter’ kaket zülusang, N Jamir-i class 6 nungi 9 kaketshirtem dang Life Skills sayu. Lai ‘Knowing your Identity’, ‘Confidence’ aser ‘Self-Esteem’ densema onük aika nung tesayuba agütsü.
Hannah Brown-i class B-9 kaketshirtem dang activity agia angazükba nung ajemdaker Phonics sayu. Iba ya kaketshirtemi melamela züngtettsü aser zülutettsü atema lir, iba den külemi English oshi olasü melemela adoktettsü atema lir.
Iba Vacation School nung kanga moa-a US nungi aiür ka aruba ajanga tenarong tajak kaketshir ka, lar medemertem aser kinüngertem dang temaitsü amshia jembiba basics sayua liasü.
Iba school co-founders N.Jamir aser Limaonen Imchen nati, “Tan summer nung onoki sayuba ya tang mezüng mera ka agir dang lir. Tarutsü nung onoki maneni  phonics aser life skills sayuba dang masü saka tanga subject tem nunga ‘activity learning’ concept benoktsü,” ta metetdaktsü.
Par telok ajanga yim nüburtem kanga ajungmesogo aser Vacation School ya teti aliba sentong ka asütsü bilemdar.