Alibaba-i India nung Internet angati agütsütsü

New Delhi, February 8 (Agencies): China nunger Internet company tetsüdii India nung internet angati agütsütsü akok. Parnoki tang telecom operators aser Wi-Fi agütsürtem den internet angati agütsütsü asoshi jembishinüdar, ta osang ka ajanga ashi.
“Onoki internet service agütsürtem aser Wi-Fi agütsür kar den longjemer mapa inyaktsü asoshi maongka angubaji reprangshitsü. Onoki internet amshirtem atema jenjang temelaba nung, aser angati agi connectivity tajungba agütsütsü merangdar. Wi-Fi agütsürtem aser ano tangar kar den tang tejembidak,” ta Overseas Business, Alibaba Mobile Business tir Jack Huang-i osangbenertem dang ashi.
Alibaba telok ajanga Internet services nung timtem aliba state tem nung angati agütsütsü asoshi bilemdangdar.
“India nung state ajak nungbo connectivity timtem mali, anungji onoki India nung internet service junga maliba state tem nung tali temolung agütsütsü. Maneni service amshirtem rongnunga shirnoki iba angati service tenüngdakba, item amala asadanger agütsütsü,” ta Huang-i shisem.
Küm ana tejaklen Facebook-i India nung telecom operator tem den senteper neburtem nem ‘Free Basics’ programme agütsütsü asoshi sentong yangludang, saka parnok programme nungi taitsüba aliba ajanga iba sentong matalok.
Free Basics ajanga website kar dang lapokteter, anungji iba atema parnok aitsüa liasü, kechiyong iba ajanga ‘net neutrality’ indang inyakyim raksatsür.