Aligarh SP lenir ka jabaso khaset

Aligarh (UP), Tsüklai/February 18 (Agencies): Gari tsüktepba lendong ka nung mangatettep adokba sülen Samajwadi Party leader ka jabaso ka khaset, ta police-i Mongolbarnü metetdaktsü.
Police sangdong ajanga, district-level SP lenir Puranmal Prajapati’er jabaso Sachin, Hombar aonung Sasni Gate tesem kübok Palasahibabad kiyong nung tepset. Motorcycle ana tsüktepba sülen mangatettep adoka long agi ontepba den prangbong agi khatep tenzükba sülen pa khaset, ta metetdaktsü.
Iba lendong nung asüsang tenu aser police ka densema nisung trok tashi yirua liasü, ta police-isa metetdaktsü.
Parnoki ashiba agi, Prajapati aser par jabasosa Narendra na backward classes dak sendakba nung sentong ka nung adeni oya aliba mapang iba lendong atalok.
Tena motorcycle ka nung mener oya aliba mapang BJP lenir Ishwar Chand Upadhyay’er jabaso Amit mena aliba motorcycle den tsüktep, ta police-i ashi.
Motorcycle tsüktepba sülen parnok tsüngda mangatettep adok aser parnok pusemertem tsüngda long agi ontepba den prangbong agi khatep tenzük, ta kasa sangdong ajanga metetdaktsü. Maneni lokti-i Amit indang motorcycle dena rongtoktsü.
Mangatetep adokba osang angazükba sülen Sachin iba tesemi aru aser pa dak injang agi khashi. Injang agi akhaba sülen pa Mozükidang asü.
Tang tashi nung nisung asem pua lir saka aija alirtem rongnung tongtiba jena ogo, ta parnoki ashi.
SP (Crime) Arvind Kumar-i ashiba agi, local temi ashiba ama telok ana tsüngda tsükchitep ali mali jangjatsü asoshi police temi nisung kar dang ken o ashishitepogo.