Tokyo, January 19 (Agencies): Alima ajunga nung tebur tambusang, Yasutaro Koide arishi küm 112 tain lia tanü, Mongolbar nü asüba osang ka sorkar ketdangsertemi metetdaktsüogo.
America nunger Wright adianunati mezüngsüa anüng nung tayimtsü yimdaktsüba ita ishika jakdang asosang, Koide Japan kübok Nagoya nung küm aika lir külen iba yimti nung tentetba mozükidang temulungjang mapa meinyaki asü ta parnoki ashi.
1903 küm March ita 13 nü Tokyo northwest tsütsülen Fukui prefecture nung asosang, Koide taoba mapang sü arür ka liasü.
Yaküm, 2015 küm July ita külem sensopur ka asüba sülen Koide alima ajunga nung tebur tambosang küma Guinness World Records otsü nung densem.
“Mapa tali meinyaki anogoshia pela aliba ajanga nisungeri arishia litettsü,” ta Koide-i taküm alidang metetdakja liasü.
Alima ajunga nung Japan nüburtem arishi talangba alir ta züngshir aser par nütsüng yongsük million 127 shi tanga arishi 65 aser tema tain lir.
You must be logged in to post a comment Login