Alima balala nung Khristantem rishikangshiba :

~  Y. Imti Tzüdir, Dimapur.

Yisu Khrista meimchir kümzüktsü asoshi tebu Tsüngremi alimai yok, saka paa Yihuda nungertemi rishikangshi aser tatem nung kangki nung angenloka tepset. Khrista alima nung alidang pa nütsünktem dang parnok dangi  tekangshi aser rishikangshi arutsü indang aiben ashiba Lai nung zülua lir. Tatishitsü agi: Mathi 24, Mark 13, Luke 21. Pa kodang shia arur kotaki atu, Pa nütsüngtemi sayutsüngia senzüdang parnoka kanga rishikangshi aser aika tepset. Tanüa kasaji alima aika nung Khristantem rishikangshia tepsetba, tenlaki raksatsüba; osang kaket balala nung azünger. Yamala osang taoba küm aser takm atalokba osang kar tatsü agi zülur. Ibai zünger asenokia sarasadem nung yaridi aser asen Naga limaibo iba ama tarudaktsü ta Tsüngrem dang mepishidi.
Muslim telok kati Khristan kibong ka aridokba: Bangladesh ya noklang nung 90 Muslim aliba lima ka lir. 2015 October ita nung par kidang telidak Khristan kibong ka kiji azüngtetang mesüra kasettsü ta nisung 100 shi arua merenshi. Par ki azüngtetbaji dang masü saka par osettsüset jenjanga meshi. Policetema aru saka telok dangji kecha meshitet. Anungji par ki toktsür aotsüsa aküm. Iba ita nungjisa Bangladesh nunger nisung asem Pastor ka kidangi arua parnoka Khristan kümner anungji iba indang shiang ta aru. Idangji parnok nisung kati kotari atsüteter pa terok rangpoktsütsü merang. Tia kaa pai arü dang tebutsü aser kiyonger kar arua pa kümzük. Saka nisungtemji jena oadok.
Syria nung Khristantem kangki nung angenlokba: Syria nung Khristantem aika ISIS-temi (Islamic State of Iraq & Syria) tepseter. Khristantem kanga rishikangshir aser nüburtemi ngua parnok angenloka südaktsür. Khristan telok balalai yariba ajanga Syria nungi khristan 158 tashibo kümzüka Poland limai yokogo. ISIS-temi yangji Khristan aika kangki nung angenloker, kar tepseter, tetsürtem kanga kangshir (rape) aser kar kangshia Muslim kümdaktsür. Syria nunger Khristan million ka dak tali par lima toktsür tanga limai jena ogo. Aser tang Khristan 2,50,000 shi dang Syria nung lir. March 25 (Good Friday) nü Yemen lima nunga ISIS teloki India nunger Catholic Putir ka kangki nung angenlok südaktsüba osang kaket nung adokbato aikati zünger alitsü.
Pakistan nung Khristantem rishikangshiba: Pakistan, Punjab Province nung tetsür ka tebur telok kati mapa tamajung inyak aser ka tebur ka den alitsü menangzükba agi mi nung tera agi dang merongset. Pakistan nung Khristantem kangshibaji meimchir tashi agi makoker.
Hindu nungertemi Khristantem kangshiba: Jharkhand State (India) nung Hindu nungertemi Khristan telok ka parnok ki ka nung sarasadema alidang prongpong, pu, koterang aser süngsü agi azük. Parnoki azükba agi nisung trokbo hospital nung among. Aji saka Khristantemi Yisu Khrista mekülemtsü aser Hindu yimsü amangtsü menangzük. Hindu yimsü sashia amangertemi Khristan aser Pastor ka tena parnok nisung 30 Khrista dang sarasademra tepsetsü ta amokmeren. Parnok jagi Pastorba motorbike raksatsü, Associate Pastorbaji atsür oagi Hindu Tsüngrem külemtsüla ta merenshi. Idangji tenla kidang nisung aika dak azük. Küm 60 tantsür ka la teka anaprong kusüktsü.
Jharkhand nungsa Pastor ka kaset: Jharkhand Khunti district, Sandhi yimtak Penticost arogo ka nung Pastor, Chamu Hasda Purty (Küm 54) Hindu nungertemi kaset. Pastorbaji kinungtsü tena kilung nung lia par kishi nung nisung kari akhushi aser shiranger kar atema sarasademtsütsü arur ta ashi. Pastor kinungtsü jagi kichiba nungi angudang nung nisung 3-4 shi army uniform agir, rifle amer noktaka angu. Kishiji melapoktsü nung parnoki nungpoka aiter Pastorbaji idakji kaset.
Khristantem maochi-i merenshhiba aser kangshia Hindu kümdaktsüba :
Hindu yimsü nung akanga amangertemi Chhatisgarh State nung aliba Kohkameta Penticost Arogo nung Khirstantem kanga kangshia züker aika hospital nung among aser karbo kangshia Hindu yimsü amangdaktsü. Khristantemji tenla kidang nungi atsüzüker süng agi azük aser sign südaktsü. Khristan yimsüji toktsütsü nangzükdaktsü. Police dang report asü saka Government-ia kecha meinyak.
Yimsü nung tenoktangba maliba ya State kar nung memelar (Freedom of Religion) Hariyana nung District Collector kati Khristantem tenla kidang senteptsü memela. Tamil Nadu nunga District Collector-i sentep kidang sentepa mekülemtsü ozüng agütsü.
Hindu nungertemi sarasadem sentep noktang: Telengana State Mahabubnagar District nung Octoper 12, 2015 ne Khristan nisung 40 shi sentepa tamanger ka kidang aonung 7:30 p.m. meta sarasatema alidang Hindu nungertem ki rakpoka aiter Khristantemji züka merenshi. Tetsür, tanur dak azük. Küm 25 tain tetsür ka shiba temang mazüng liasü la dak azük aser tesülen tanurji tebok nung asü.
Kasa tatalokbaji Delhi yimtiba nungi kilometer 35 shi pilar Khristan telok ka ki ka nung sarasadema alidang Hindu nunger telok ka aiter Khristantem dakji azük aser pur oa Police station ka nung yutsü. Aser yamai ashi, “Ibai Hindu lima ka lir, nenok sarasademji onoki magizüker.”
2020 nungbo Indiaji Hindu Lima ka asütsü: (India a Hindu Nation by 2020)
2014 Lok Sabha election nung BJP aniba kübok Govt. yanglu. VHP lenir Ashok Singhali ashi, “ 2020 nungbo India ya Hindu linük ka akümtsü.” Ano pa Sai Baba tekülemdaki aodang Sai Babai pa dang ashibaji “2020 tashi nungbo India ajunga Hindu lima aser 2030 nungbo alima ajunga Hindu yimsü amangertem asütsü aser tang iba temelenshiji adokogo. Ibai Hindu nunger sentong süra asenok Khristangtema kechi sentong ayutsü ? Kechiaser Laishiba nung Tsüngremi ashir, “Anungji nenoki oang aser kin ajak nütsüng kümdakjang, Tebu, Techir aser Tanela Temeshi tenüng nung parnok baptijang” (Mathi 28:19)
“Onoki Tsüngrem dak amanger” ta America nunger sen nung zülua alibaji agientsüla.
America nung doctor ka den lawyer kati anir Tsüngrem dak mamanger rogo (atheist) telok kati agüja lir. Parnoki Tsüngrem dak mamanger nung koda sür “Tsüngrem dak onoki amanger” ta zülutsü ta parnoki kuli agütsü.
Tesüngmantsü aser taaktsü osang kaji Jalaun yimtak (UP) Barjrang Dalpurtemi nisung ka tekolak ku ongdoktsü aser gado ka nung mendaktsür anir senzü. Ibaji pai Hindu nunger kar Khristan kümdaktsüba ta tamang makai bilemba agi (suspicion) inyak.
India nung Khristantem anema rarabaji tali kümdagi : February 5, 2015 nung New Delhi nung Khristantem aikati parnok rishikangshiba anema apuso. Mumbai nung Hindu nungertemi 2015 küm anogo shia Khristantem rishikangshiba ajanga pastor tenet asü aser nisung 800 shi timtemdaktsü; iba atema Khristan telok kati yamai meinyaktsüla ta noktak. Catholic Secular Forum (CSF) teloki parnok 2015 küm tatem report nung ashib agi, “ 2015 küm ishiba agi 365 tashi India nung Khristantem rishikangshiba, tetsürtem kangshiba, amala liasü.”
Madhya Pradesh nung Temulung meyipba ozüng aibelena amshiba:
Bhopal nung Archibishop Leo council-i ashiba agi, Madhya Pradesh nung tamangba yimsü ka nungi kati meyipa ozüng (Conversion Law) meshitaki amshiba ajanga Khristantem tali timtem angur. Tatishitsü agi, tesem ka nung Khristan 12 sarasademtsü sentep nung parnokji kar tashiyim (force) agi temulung meyipdaktsür ta aija jail-i yok. Yamala tiyazü nung aija inyakba aiben ataloker.
Khristantem anema apusor (Christan Protest). Arogo balala nungi Khristantem 1500 dak tali senteper Azad Maiden nung February 4, 2016 nü prayer centre ka nungi 2016 January tatemlen yangji inyaker pastor ka aser staff ka pur aoba anema noktak. Parnokji tiyazü mojing ain (Black Magic) amshir ta sür police arua apu. Saka aji olulu dang liasü, kechiaser Prayer Centre nung kodaser black magic amshitsü. Pastorbaji jamin nung agizüker Thane nung Jupitor Hospital nung mozü agia liasü (treatment).
India Sorkar Temzüng (Constitution of India) Okila (Preamble) nung India ya “ Sovereign Socialist Secular Democratic Republic” aser ano senso ajak atema “Liberty of thought, expression, belief, faith & worship” ta agüja lir. Aser ano temzüng 25 nung “Right to Freedom of Religion” ta agüja lir. Asüyonga Hindu nungertemi asenok Khristantem kanga kangshir aser sorkaria aji züzüa dang yutsür südi. Item tatalokba yagi Mathi 24 nung Yisui ashibato ataloker ta angateter. Denomination balala asüyonga parnoka Yihova Tsüngrem dak amangertem lir aser asenoki kecha agia meyaritet yonga sarasadem nung kija, kibong, arogotem aser lokti balalai lumia sarasademtsü nungbo Tsüngremi langzütsü ta kü tebilemba ka lemsateper. Tazünger ajak Tsüngremi moajangma, AMEN.