Alima lendong atema ajak nem tesayuba agütsütsüla: NDRF

New Delhi, April 17 (Agencies): India nung mapang-mapang shia menoknok, tzümetsüng aser kiojen chirepba lendong kanga bulua atalokba nung ajemdaker NDRF-i, nisungi yangluba lendong aser alima tzü-mopung lendong nungi kümzüktsü atema sensotem nem tesayuba agütsütsüla, ta ashi.
Tang mezüngsüa IIT Delhi-i  response mechanism aser National Disaster Response Force indang tebushitetba report ka agütsüogo.
Research agir ana- Dr Mahim Sagar aser Deep Shree nati renemba osangji anogo ananü ‘Conference on Brand Management’ nung metetdaktsüogo. Iba senden ya Indian Institute of Technology-i Delhi nung ayongzüka agi.
Yashi iba osang benokdang NDRF Director General, O P Singh-i, “Onok mapa dak sentakba nung mapang shia onoki nüburtem nem tashi agütsür. Lendong malidang onoki iba (tesayuba agütsüba) ya inyaker. Onok tangatetbaji, linük nübur ajak nem disaster management & disaster response atema tesayuba agütsütsüla,” ta ashi.
Jammu & Kashmir aser Chennai na nung tzümetsüng lendong, tawa Kolkata nung flyover chirepba lendong aser yaküm Nepal nung menoknok lendong tulu atalokdang NDRF sepai 12,000 shi madak tongti, Singh walunir ser kümzükba maparen inyaka liasü.
“India nung, nisungi yangluba lendong aser alimar lendong agi kongshitsüsa nisung million aika alir. Alima nung lendong agi mejungi kongshiba linük pongu rongnung India densema lir, iba sülen US, China aser linük kar lir,” ta paisa ashi.
“NDRF indang tongtibangtiba mapaji akokba tashi nisung timtiba kümzüktsü aser teraksatsüba tajemba asütsü atema lir, aser ibaji osettem teyari ajanga dang sepaitemi tekaraba nung inyaktsü akoktsü,” ta pai ashi.
Tawa NDRF-i oset tasen 24 alizükogo, aser item rongnung level suits, light weight powerful generators, rope rider system, inflatable LED lights, life detectors aser deep penetration ground sensing radars densema lir.
NDRF nung battalion 12 lir aser iba force ya Union Home Ministry kübok inyaker.