Alima lendong teraksatsüba ajema akumtsü sentong tenzükogo

Kohima, July 07 (TYO): Alima tzü mopung melenshiba dak sentakba nung anogo ananü Disaster Risk Reduction (DRR) shisadokten sentong Brihostibarnü Capital Convention Center, Kohima nung tenzükogo; Tetenzük sentong nung tongti tesemdangerji Nagaland Chief Minister, T.R Zeliang liasü.
Iba sentong nung jembidang Chief Minister-i, alima tzü mopung melenshiba ajanga alima lendongtem kanga bulua aser sashia ataloker aser iba ya shisabutsütsü onük ka lir, ta metetdaktsü.
Pai ashiba agi, tawa tesem nung menoknok sashia anokba aser tsüngsang mopung balaka melenshiba ya ajanga alima lendongtem aseni ajangshiba kuli angur, aser item lendong ajurutsü atema asenok renema alitsüla.
Paisa, asenoki alima lendongtem menokdangtettsü, ajisüaka taküm samaba aser kiojen raksababo asenoki ajema kümdaktsütettsü, aser iba dak sentakba nung Disaster Risk Reduction benokogo, ta ashi.
DRR ya  tangatetba tasen ka lir, aser iba ya alima lendongtem jangjatsü, asadangtsü aser teraksatsüba ajema kümdaktsütsü atema lir, ta paisa metetdaktsü.
CM-i ashiba agi, tesüiba küm ishika tsüngda alima lendongtem ya tulubaka tzü mopung melenshiba ajanga lir, anungji DRR sentongtem aser alima tzü mopung melenshiba mapatongtem sentaktsüptsü nüngdaker.
Tawa yipru mopung tesashi ajanga state kübok district ishika kongshidang nüburtemi yaritepba atema CM-i tenüngsang agütsü.
Paisa, state nung alima lendongtem atema renema alitsü asoshi Nagaland sorkari mera aika agiba indang metetdaktsü.
(Maneni tapak 9 nung…)