Alima lenirtemi asür Fidel Castro nem tetushi agütsür

Taoba Cuba lenisang, Fidel Castro asüba osang angazükba sülen US kübok Florida state nung tentetba Miami yimti nung alir Cuba nüburtem yimti yimdong nung pelatepba noksa nung angur. (Miami, November 26)

Havana, November 26 (Agencies): United States (US) kidangsüa, Cuba linük nung temelenshi bener aruja, par linük communist linük ka kümdaktsüsang, taoba Cuba lenir, Fidel Castro asüba osang angazükba sülen alima lenirtemi asür Castro nem tetushi tanü, Honibar nü agütsüogo.
Ajisüaka, asür Castro aser par lenisütsütsüren anemertemi pa tashiyim agi yimsü asür lenir ka ta züngoka, pa asüba osang angazükba sülen kanga pelateptsü tenzüka lir.
Castro arishi küm 90 tain lia, yashi, Hokolbar nü asüba osang ka pa melenzüka, Cuba lenisütsü menden abensang, Raul Castro-i state television ajanga alima dang sangoktsü.
“Castro-i par linük aser alima otsü nung otsüsütsüsa züngshitsüsa rongsenren aser yimtenren senmang tulu yutsüogo. America linüki Cuba linük anema tenokdangtsü sentong tesashitiba benokdang asür Castro-i tasüita nokdaka, par linük tali tashi itdakja aru,” ta Soviet Union madak tatembangsüa yimsü asüsang, Mikhail Gorbachev-i metetdaktsü.
“Alima linük aikati ajizüktsüsa inyaksang, asür Castro Russia’er tembar tajung ka liasü aser pa asüba atema kanga temulung shiranger,” ta Russia Tir, Vladimir Putin-ia telegram ka ajanga lemsatepa liasü.
“China linük aser nüburtem tembar aser tenungiter tajung ka samaogo,” ta shia, Cuba den külemi, alima ajunga nung communist yimsüsütsüren rendaktsütsü maparen nung Castro-i tongti shilem agiba olen ka China Tir, Xi Jinping-ia metetdaktsü.
“Castro taküm alidang aser pa asüba sülena par linük ajungmesotsü,” ta Cuba pusema nungiter aser yimtenren sabang nung US anema kanga sashia nokdaker, Venezuela linük Tir, Nicolas Maduro-ia metetdaktsü.
Castro tembar, ‘Che’ Guevara 1957 küm asüdak, Bolivia Tir, Evo Morales-ia Castro asüba atema sasaba bilemba olen ka metetdakja liasü.
Alima sabang nung tongti lenir aser Washington aser Havana na tsüngda tanaben sentaktepshitsüren nung tongti shilem agisang, Castro asüba atema mangyima bilemba olen ka France Tir, Francois Hollande-ia sangoktsü.
Ajisüaka, US nung alir Cuba nunger meyirijang jenti Castro asüba osang angashiba sülen kanga dang pelatepba osang angazükogo.
“Tashiyim agi yimsü asür ka süogo aser Western Hemisphere nung tatembangba communist mitsa nung putu tasen ka tenzüktsüsa jenjang tajung ajuruogo,” ta US’er Florida state kübok Miami nung alir Cuban-American US Congress representative, Ilean Ros-Lehtinen-i metetdaktsü.
“Cuba nüburtemi chijiba nüchiso nguogo,” ta ayimtena, Miami nung alir Cuba nübur meyirijang jenti pelatepba osanga angazükogo.
“Cuba, Latin America aser Africa nung nisung jenti südaktsütsang, tashiyim agi yimsü asüsang, Castro süogo,” ta Cuba sorkar anemer tongti telok, Patriotic Union of Cuba lenisang, Jose Daniel Ferrer-ia pelaba olen ka metetdakja liasü.