Alima lenirtemi New York nung Syria yimjung senden amener

International Syria Support Group (ISSG) ta ajaba alima tashi abenba linük lenirtemi US kübok New York yimti nung ayongba Syria yimjung senden nung shilem agiba noksa ka yangi angur. (New York, December 18)

New York, December 18 (Agencies): Alima tashi abenba linük lenirtemi US kübok New York yimti nung ajurutepa Syria’er yimtenren ken o bentettsütsü senden ka tanü Hokolbar nü menogo.
United Nations (UN)-i ayonger Syria sorkar aser sorkar anemer na tsüngda yimjung tezüngzüktep agidaktsütsü senden amentsü hopta ka shi anünga alidang, alima tashi abenba linük lenirtemi tan agi Syria yimjung senden tasembuba amener lir.
Syria Tir, Bashar al-Assad pusemer, Russia o Iran na densema, taoba mapang Vienna nung anaben tashi amenba senden nung shilem agirtemi tan New York yimti nung ayongba senden nunga shilem agiba osang ka US State Department-i metetdaktsüogo.
“Syria sorkar aser sorkar anemer na tsüngda yimjung tezüngzüktep agia parnoki külemi lokteper teloktep sorkar tasen tentettsü ajungshitsü aser kasaji mapa küma inyakdaktsütsü nükjidong nung alima lenirtemi tan senden ya amen tenzükogo,” ta State Department otongdar, John Kirby-i osang jangjashitsü.
Tan senden nung shilem agir, International Syria Support Group (ISSG)-i tan senden nung agiba telemtetbatem mapa küma inyakdaktsütsü nükjidong nung kasaji UN Security Council (UNSC) nung benoktsü sentong renema lir.
“Syria ajunga nung tongpang raraba anenja tekaratiba mapang nung yimjung tezüngzüktep agidaktsütsüa tan senden nung shilem agirtemi nungdakba telemtetba agitsü ajungshir,” ta UN Secretary General, Ban Ki-moon-ia metetdaktsüogo.
Kiralongrar telok tarensen tejangja renemba ajanga Syria yimjung tezüngzüktep agitsüren nung koba teloksa manioktsü iba osang jangjashitsü asoshi tan senden nung shilem agir ISSG-i alizüng yua lir.