Alima lenirtemi Turkey nung refugee senden ka amener

Istanbul, May 23 (Agencies): Alima lenirtemi Turkey kübok Istanbul nung ajurutepa refugee aser migrant nisungtem den sentakba tongti senden ka tanü, Hombar nü menogo.
Tarutsü mapang refugee nisungtem den sentakba maparen takok ngua inyaktsü nükjidong nung teinyaktsü mapatong aser tapet temzüng ozüng latettsü alizüng yur, United Nations (UN)-i ayonger külen, tan mezüngsüa Istanbul yimti nung World Humanitarian Summit amener lir.
Refugee nisungtem den sentakba onük tongtipangsüa benokba den külemi, alimai mapang shia ajurushiba lendong tsüngdong balala nung nüburtem yariteptsü aser tang terenlok ngua aliba linüktem nung alir nübur taküm jenjang tajungba kümdaktsütsü nükjidong nung ayongba senden ya tan Bodbar nü tashi amentsü sentong renema lir.
“Alima tesem balala nung mapang shia lendong tsüdong ajurua nüburtemi timtem toushi jenti ajurur. Iba ama tensa ka nung alimai ka küma lungjemer nungdakbapur yaritsüla,” ta UN Deputy Secretary General, Jan Eliasson-i tanü metetdaktsü.
Tan senden nung alima linük 125 dak tema nungi lenirtemi shilem agiba osang jangjaogo.
Tanü tashi nung nisung million 130 dak temai pei talikdak toktsür bendanglen aser tanga tesemtem nung jenoka alitsüsa akümba osang bushiteta lir aser tan senden amendak, Turkey linüki refugee nisung million 2.7 shi mesüa parnok nem jenokdak agütsüba osanga bushiteta lir.
“Alima tesem balala nung timtem toushi jenti ajurushia alirtem indang taküm jenjang tajungba kümdaktsütsü asoshi nungdakba maparen inyaktsü maongka tajung ka tan senden amenba ajanga angur lir,” ta UN Under Secretary General, Human Affairs, Stephen O’Brien-ia metetdaktsü.
“Tan senden nung shilem agirtemi tang alimai ajurushia aliba refugee aser migrant nisungtem den sentakba khuret 2030 küm tashi nung tesadang ka agi tajemba kümdaktsütsü ajungshir kechiyong asenoki asen alima tajungba kümdaktsütsü nükjidong nung tan senden nung shilem agir lir,” ta UN Secretary General, Ban Ki-moon-ia tanü senden nung shilem agirtem ajungshia liasü.
Küm 4 tejaklen nungi tenzüka, Ban-i alima linük 150 shi nungi lenir aser tongtipang nisung 23,000 dak tema den ajurutepba shisatsü agiba sülen UN-i tan senden ya ayongba osang jangjaogo.
Tan senden nung shilem agirtemi tongpang rarabaren anentsütsü, tongpang raratsü temzüng ozüng benshidaktsütsü, shinga sendoka meyutsütsü, alima tesem ajunga nung sensak tia agientsü aser nübur taküm jenjang tajungba kümdaktsütsü alizüng ajangzüktsü madang yua lir.