Alima lenirtemi Vienna nung Syria senden amen tenzüker

Austria kübok Vienna nung amentsü ayongba Syria yimjung senden nung shilem agiba jakdang US Secretary of State, John Kerry-i Germany Foreign Minister, Frank-Walter Steinmeier; UN’er Syria Special Envoy, Staffan de Mistura aser US Assistant Secretary of State, Anne Patterson nunger den sensak asemba noksa nung angur. (Vienna, October 30)

 Vienna, October 30 (Agencies): Syria nung mangatettep adoka küm 4 dak tema tongpang rarabaren anenja yimtenren tebentetbaren bener arutsütsü nükjidong nung United Nations (UN) aser European Union (EU) na den külemi, alima linük 17 dak tema nungi lenirtemi Austria yimtiba, Vienna nung senden amen tenzükogo.

Tan senden nung Syria Tir, Bashar al-Assad aser pai aniba sorkar pusema yariba tongti linük ana, Russia aser Iran natia shilem agiba osang jangjaogo.

“Tan senden amenba ajanga Syria den sentakba mangatettepbaren ajunga magientettsü saka tan senden nungi tenzüka alima lenirtemi külemi lungjemer Syria nung teti asoshi yimji yimjung bener arutsütsü alizüng yua lir,” ta tanü senden nung shilem agiba jakdang US Secretary of State, John Kerry-i metetdaktsü.

Tan amenba senden ya tajemdakdak lung ka kümdaktsür Syria nung yimtenren tebentetbaren bener arutsütsü asoshi alima lenirtemi inyaktsü alizüng ayuba olen ka Germany Foreign Minister, Frank-Walter Steinmeier-ia tanü senden amenba jakdang metetdaktsü.

“Syria asoshi yimtenren tebentetbaren bener arutsüba jakdang, par linük tesep tenteta lendong kanga sashia atalokdaktsüba Islamic State (IS) kiralongrar aser Jabhat al-Nursa telungpurtem tamasa samatsütsüla. Iba alizüngji asangsang nung ajangzükba sülen ang Syria nung yimji yimjung litettsü,” ta France Foreign Minister, Laurent Fabius-ia tanü metetdaktsü.

Ajisüaka, tan senden nung shilem agitsü asosh Syria sorkar aser sorkar anemer telok ka danga jaoka mali.

Ano külen, tan senden nung shilem agirtemi lenji otepa olemteptsü tajungshiba olen ka UN Secretary General, Ban Ki-moon-ia metetdaktsüogo.