Alima lennirtem Paris nung tzü mopung atema jembitsü

November 29, 2015 : Jakarta, Indonesia nung ‘Global Climate March’ aoba mapang tzü mopung ajungtsü atema inyakertemi o zülu balala amer tangokba noksa nung angur. Iba sentong ya Paris nung akatsü aliba U.N-i ayongba tzü mopung sentong den sentaktepa jila amungna sentong ka lir.

Paris, November 29 (Agencies): UN-i benokba, alima nung tzü mopung melenshiba tsütsü olemteptsü asoshi Paris nung alima lennir nisung 150 dak tema adenshia senden ka akatsü.
COP 21 (21buba Conference of the Parties) senden Hombarnü (November 30) nungi tenzüka amenbaji December 11 nü tembangtsü, ta BBC-i metetdaktsü.
Tan iba senden Paris nung akadang tajemba agi linük 190 shi arua adentsü aser iba mapang tzü mopung melenshiba tsütsü telemtetba tasen ka agitsü koba ajanga meimchir inyakyim balala ajanga ‘greenhouse’ akoksadaktsüba nokdangtsü.
Senden nung nisung 40,000 shi adentsü imlar. 2009 küm Copenhagen nung kasa onük jembitsü asoshi nisung 115 sendena aliasü.
Tan November 13 nü France nung kiralongrartemi lendong agütsüdang nisung 130 taküm lalutsüba memokongi lia iba senden agiba ajanga senden kanga tashi ita aser jangratema agitetsü imlar.
“Tan senden nung telemtetba tajung agitettsü kechiba süra COP tem dang tejangraba tulu nung lir,” ta Maldives nungi Alliance of Small Island States nung mendenbuba, Amjad Abdulla-i ashi.
Iba senden mesentepdang nungi France nung security kanga sashi lir, ta BBC osang ajanga ashi.
Police 8,000-i France arrtsü ajaklen mita atatsü aser senden akatsü aliba tesem, Paris anudoklentip tsütsü aliba Le Bourget nung security züngsem 2,800 tashi yutsütsü lemzüktsüogo.
Yimti nung tongtibang gari lenmang kar anogo ananü asoshi shibanga atatsü metetdaktsüogo.