Alima linüktemi Islamic State den raratsü UN nung lemtetogo

United Nations/United States, November 21 (Agencies): Hokolbar nü UN Security Council-i alima linüktemi Islamic State (IS) kiralongrar telok den raratsü atema nüngdakba mera ajak agitsü atema tashi agütsüba pangzüng ka ajaki mulunga agizükogo.

Taoba hopta IS kiralongrartemi Paris amakba sülen France-i UN züngsem linüktem dang IS aser Al Qaeda den tesentaktep aliba teloktemi mapa inyakba nokdangtsü aser parnok samatsütsü atema asentenshir yariteptsüla, ta benoka liasü.

France Foreign Minister, Laurent Fabius-i UN nung iba bangzüng agizükba pela agizükogo aser sangdong ka ajanga pai, iba bangzüng ajanga alimai IS Jihadist anema noktaktsü temulungtetba sayur, ta ashi.

“Joko tangbo, iba rara atema linük ajaki mera takang agitsüji tongtibang, iba raraji mitkartem ajanga, yimtenren ken o ajanga lenmang bushiba mesüra kiralongrartem rongsen lenmang anema raraba asütsü akok,” ta France minister-isa ashi.

UN-i IS ya “alima tebilemtsü ka aser alima yimjung aser security atema amokmeren,” ta agizüka iba bangzüng ajanga linüktem dang Iraq aser Syria linük nati bendanger rarartem (IS atema raratem) aoba nokdangtsü mera takhangba agitsüla,” ta mepishiogo.

Iba bangzüng ajangasa kiralongrartemi Paris aser Beirut amakba sashia aitsüba den taküm Tunisia, Turkey aser Egypt linüktem nunga rara-a tetshia lir.

Brihostibar nü France linüki züngsem 15 aliba Security Council nung ibaji benoka, Syria aser Iraq nung IS amaktsü atema tekaraba nung International-i lemtettsü mepishia liasü.

Iba bangzüng nung UN Charter nung Chapter VII bo maden, koba ajanga linük ka arrtsülen temalen nungi mitkar tashi amshitsü tashi agütsür.

Yashi Islamic kiralongrartemi Mali yimtiba, Bamako nung hotel ka amakdang nisung 27 tashi tepsetba sülen tanü New York nung UN Security Council-i alimai IS kiralongrartem anema raratsü telemtetba ya agiogo.