Alima mekongdaktsüba

Kidang soruchiokdang mi apuba kija agi masü saka asenoki tesangwa atema light atsükba agi, garitem jajadang mokozü tatsük adokba agi, kechisarina yangludak factory nungi mokozü aser tango tatsük adokbatem agi alima tatsükba-tatsükba kümdagi. Item tango tatsük jagi mopong tatsük akümer aser mopong tatsükji nisungtem asoshi tashidak lir. Atangji, alima mekongdaktsütsü mechi light metsüloki melitet, gari mamshii melitet aser osettsüset aser chiyongtsü tapu balala yangluba factory aser industries shibanga meyutet, kechiyong tanü limaji kechisarina ajak tekaratiba nung talangba atongtsü aser teimba yanglutsü toktepba putu lir. Ajisüaka, nisung ajaki akok tashi alima mekongdaktsütsüba nung shilem tilakabo agitettsü. Iba tangatetba nung yakanü Bodbar nü Kohima nung Angami Youth Organisation (AYO)-i anepdang 6:00 ako nungi nikongdang 6:00 ako tashi ghonda terana kanga rongdak nüngdakba purtem indang gari dak alaka, tangar gari kata mesenzüdaktsü, light tashi ajanga mapa inyakbatem ajak anendaktsü aser kidanga light tashi ajanga amshiba osettem kanga ajema amshidaktsüba ajanga Kohima lima kanga süngjema aküm. Gari ola mali, television aser kongki nung ken atenba ola mali aser kechisarina yangluba aser menüngba gol ola kenyongi mali, Kohima agi Kohima memesük ghonda 12 süngjemba jagi nisungtem tekolok shisatsü dena süngjemdaktsüogo. Atangji, tanü ya rongsen yangluba putu asünungji, iba tsütsü bilemdangdangbo ghonda 12 gol ajak shibanger mapa meinyakbaji takoksa tulu adoktsü. Ajisüaka, takar sür tzü mopong tamajung chia alitsübaji nisunger tamashi mapa ka asütsü. Aji oda, putu yimya agi memelar asünungji, nisungtem nem tangtetba agütsütsü asoshi anogo ka tzü mopong memenendaktsüi amonger dang ashi, anogo shia AYO teloki ayongba amajibo memongtettsü. Ajisüaka, anogo ka light apayua atsüktsü, gari kanga mamshitsü aser gol amshia mapa inyakertemi akok tashi mokozü tamajung madokdaktsüi inyaktsü merangra, iba kisüng jagi alima tzü mopong kangabo memenendaktsüi kümzüktsü. Aji oda, asenoki kidang menüngdakba mapang light tsükloka mayuba jagi light bill dang nungibo alima tzü mopong tuluba kümzüktsü. Aji oda, akok tashi asenoki atongbaka tashibo tetsüng agi jajara mesüra bicyle nung senzüra iba jagi alima tzü mopong merüktetba aser mekongdaktsüba maparen nung teyari tuluka agütsür asütsü. Tanü asüng joko yimya sübadoker tetsüng agibo lenmang tatsükata mouner iba jagi asen temang nunga tashidak adoker. Aji oda, gari nung dang jajaba agi tzü mopong menendaktsüba lendong dang nungi tuluba asen temang nung tashidak agi atonger. Item ajakji asadanga alima nung nisungtem anema alitsü asoshi tzü mopong merükdaktsütsü merangdang asenok senotsüa kümzüker aser temanga anema alir. Atangji, alima nung tzü mopong memenendaktsüi kümzüka ayutsü atema asenok ajaki süngdonglidong atemer aser ali küma maotsüba janaona mashi nung meindoker. Iba denji ano paper ya süngdonglidong agidang yanglur asünungji süngdonglidong kümzüktsü asoshi paper kanga apayua agir. Iba tangatetba nung tanü asüng balaka aikati envelope tejen amshir aser shidia tapak külen zülusar aliyonga tajunglen zülur amshir. Iba amaji kodang nisung aikati paper apayua amshidir alima nung memeteti aser meteta süngdong aika kümzüker. Aji oda, kari danga asen dangi envelope tejen mesüra shidi tapak külen zülur aliba paper tejen nung nüngdak zülur agütsüra, ibaji sen apayuba agi masü saka alima apayuba agi inyaker ta angatetdi aser item jiluji ajizüka inyakdi. Ibaji mesüka alima tzü mopong kümzüktsü asoshi office mesüra tenla ki ana nung alirtemibo akok tashi gari mebeni tetsüng agi aotsü merangtsüla. Aji oda, ano nisung shiai hopta nung anogo kabo gari nung memeni jajatsü mulungteter inyakra iba jagia tzü mopong merüktettsüba nung tuluka yaritsü. Iba amaji hopta nung kenbo mesüra ita nung kenbo pei meyong gari aika liaka gari mamshitsü telemtetba agitetra alima kümzüktsü asoshi tenla tulu agütsür asütsü. Aji oda, alima kümzüktsü merangba mapaji asen taküm aser tarutsü lanurtem taküm kümzüktsü merangba mapa lir.