Alima mitkartemi tongti IS lenir 3 tepsetogo: Pentagon

Baghdad, December 11 (Agencies): US-i aniba alima teloktep mitkar tayimtsütemi Syria aser Iraq na nung tesep tenteta lendong atalokdaktsüba kiralongrar telok tetsüti, Islamic State (IS) nung rongsen ketdang asüsang densema, par tongti lenir 3 tashi tepsetba osang ka Pentagon-i tanü Hokolbar nü metetdaktsüogo.

“Alima teloktep mitkar tayimtsütemi IS telok asoshi tashiyim agi rongsen bendener lenir mongin, Abu Salah densema, tongti IS lenir 3 tashi tepsetogo,” ta teloktep mitkar telok otongdar, Steve Warren-ia osang jangjashitsü.

Salah asüba ajanga IS teloki rongsen bushitsü mapatong nung tamakok tulu angutsü ta pai shisem.

Alima teloktep mitkar tayimtsütemi Iraq kübok Ramadi yimti nunga IS kiralongrar 350 shi tespetba osang jangjaogo ta Warren-i ashi.

Iraq mitkartemi taoba hopta nungi tenzüka Ramadi yimti tesem aika IS ket nungi tanaben agishitsü tenzükogo saka IS teloki tanga Ramadi yimti shilem tuluba ka agia lir.

“IS teloki ozüng alema totzü ayokba, Syria aser Iraq na nung tentetba bank nungi tashiyim agi dollar sen billion 1 dak tema agiba aser nüburtem nungi rakzükba sen densema par senpong nung dollar sen million 500 dak tema bendena aliba osang bushiteta lir,” ta US Terrorism & Financial Intelligence Office ketdangser, Adam Szubin-ia metetdaktsüogo.

Paisa ashiba agi, IS telok indang rongsenren jenjang tamajungba kümdaktsütsü nükjidong nung par US-i alima teloktep linüktem aser Iraq sorkar na den külemi amalitepa inyaktsü tenzükogo.

Ano külen, IS telok indang rongsenren jenjang tamajungba kümdaktsütsü tasa aser onüktem benoka jembitsü asoshi US Treasury Secretary, Jacob Lew-i anir United Nations Security Council finance ministers senden ka New York yimti nung taruba hopta amentsü ayonga lir.