Alima nung COVID Facility tulutiba Delhi nung yanglur

New Delhi, June 16 (Agencies): Linük yimtiba nung coronavirus agi shirangertem anepalutsü atema Delhi sorkari alima nung COVID-19 care facility tulutiba yanglutsü tenzükogo.
Delhi sorkari South Delhi nung aliba Radha Soami Spiritual Centre nung yipden 10,000 dena COVID-19 care facility ka khen atema yanglur.
“Onoki corrugated cardboard ajanga yipdenji yanglur aser cardboard nung ghonda 24 dak tali virus meliteter asünung yipden mozü agi merüktettsü nüngdak madoker. Yin, plastic aser wood süng nung anogo 5 tashi virus liteter. Iba yipden yanglua agütsüba atema onoki kanga nüma tanga bilemer” ta Dhavan Box Sheet Containers Pvt Ltd, Director, Vikram Dhavan-i tanü ashi.
Chhatarpur centre indang kimung tasazükji 12,50,000 square feet lir aser ibaji football ground 22 shi asütsü. Iba centre nung fans aser CCTV cameras enoka lir aser khen nung nisung lakh 3 shi adenshitsü akok.
“Tawa tashi nung iba centre nung aayangertem anenzükdaktsü. Jokaji semi-industrial lir aser khen nung nisung meyirjang aika atema anepalua chiyungdaktsütettsü” ta Radha Soami Satsang Beas, Bhati Mines, secretary Vikas Sethi-ia ashi.
Iba mapa ya South Delhi district magistrate BM Mishra-i ketdangsüa repranger aser pai ashiba agi, “Centre sorkar indang Covid aser healthcare guidelines nung aliba ama facility ji yanglur aser iba nung mini hospital 20 shia nung yipden 500 alitsü.”
“Yipden 500 aliba hospital shia nung yipden 50-100 adenba enclosures alitsü. Yipden 10% tashi nung oxygen supply alitsü saka ventilators malitsü. Kanga mejungi shirangertem anir oa anepalutsü atema onoki super specialty hospital tem den jembitepogo” ta Mishra-isa ashi.
Iba centre nung doctor 400 shi ka mapang lemsar inyaktsü aser ambulance tem den sample tendangtsü atema pathology laboratory yanglutsü, ta paisa shisem.
June 30, 2020 tashi nung iba centre dak sendakba maparen tembangtsü atema kanga meranga inyakdar, ta paisa shisem.
Delhi sorkari asadangba ka nung, taküm July ita tatemlen ka tashi nung Delhi nung nisung lakh 5 tema dak COVID-19 putettsü. COVID-19 agi shirangertem anepalutsü atema yipden lakh ka shi nüngdaktsü.
Delhi nung tang sorkar mozü kitem, central aser nija hospital tem nung COVID-19 agi shirangerten anepalutsü atema yipden 10,000 shi lemzükja lir