Alima nung kiralongra ya amokmeren tututiba lir: PM Modi

Maputo, (Mozambique), July 07, 2016: Brihostibarnü Mozambique yimtiba, Maputo nung Ato kilonser, Narendra Modi-i sepaitem repranga aoba noksa nung angur. Kasa noksa nung Mozambique Tir, Filipe Nyusi-a angur.

Maputo/New Delhi, July 07 (Agencies): Kiralongrartemi linük balala amakba dak sentakba nung tanü Brihostibarnü Ato kilonser, Narendra Modi-i, alima atema amokmeren tulutibaji kiralongraba lir, ta ashiba den külemi Indian Ocean ajanga sentaktepba linük ana- India aser Mozambique tsüngda security aser defence tesentaktep tajungba akumtsü atema jembi.
Maputo nung Mozambique Tir, Filipe Nyusi den senden amenba sülen tezüngzüktep ka agi. Iba tezüngzüktep kübok India-i linük nung jenjang ajemtsü atema par linük dang nungi menjang alitsü.
India ji Mozambique indang melungtok tembar ta shia Ato kilonser Modi-i AIDS tashitak indang mozü densema nüngdakaba mozütem Mozambique nem tenla agütsütsü sangdong, aser ibaji ajanga Africa linük, Mozambique nung public health system tashi aittsü, ta metetdaktsü.
Iba linük terenlok aser azükaru lenmang nung jajadang India-i yaritsü ta Modi-i nangzükba den külemi Mozambique security forces tashi aittsü atemaa yaritsü, ta ashi.
Linük ana nungi lenir ana tsüngda shishilembaba aser investment nung tesentaktep tajungba akumtsü aser tanga lenlatem nunga amalitepa inyaktsü atema jembiba sülen osangbenertem den jembidang Modi-i, “Nüburtem tajangzük angutsü atema asenoki  terenlok aser rongsenkettsüng jenjang tajungba kümdaktsüner. Asenoki asen nüburtem kümzüka lidaktsüner,” ta ashi.
“Tanü alima nung security amokmeren tulutibaji kiralongraba lir,” ta paisa ashi.
Pai ashiba agi, kiralongraba networks ji temesepba mozü shibelenba densema ozüng alema inyakba tapu balala aika den senaktepa lir.
India aser Mozambique na ya Indian Ocean agi sentaktepa lir ta shia Modi-i security tayongzükba balala indang jembi. India-i training agütsüba aser raraba osettem ajanga Mozambique security forces yaritsü, ta Modi-i metetdaktsü.
Africa linük pezü semdangtsü atema tanep Modi apuso, aser mezüngbuba anogo nung pai iba linük semdang.